amalinks wokungena

Breaking News

Uzulu Usola Ukubotshwa Kwabalwa Impi Yenkululeko


Abalwa impi yenkululeko.
Abalwa impi yenkululeko.

Uzulu usola ukuhlukuluzwa kwenkokheli yenhlanganiso yabalwa impi yenkululeko ye Zimbabwe Liberation War Veterans Association ( ZNLWVA ), asebebotshwa ngoba bekhulume iqiniso labo phezu kwesimo selizwe.

Ukubotshwa kwamadoda la kuchazwa njengendlela yokudinga ukuba ngobani abaloba ugwalondaba obelukubeka sobala ukuba umongameli Robert Mugabe sekumele asuke esikhundleni akiso sokukhokhela ilizwe.

Lokhu kuhlukuluzwa kwabalwa impi yenkululeko laba kuqale izolo lapho ophethe uhlangothi lwezokukhulumisana lozulu kiyo uMnu. Douglas Mahiya,eye wayazinikela emapholiseni ohl;angothi lwe Law and Order kunkamba ye Harare Central Police Station,ngemva kokuba enxunsiwe ukuba enze kanjalo.

Uhle wavalelwa uMahiya esetheswa umlandu wokufuna ukugenqula uhulumende owakhethwa okusemthethweni kanye lokuhlambaza ihofisi kamongameli.

Engakedluli amahola angamatshumi amabili lane ( 24 hrs ) kwabotshwa unobhala jikelele kulenhlanganiso umnumzana Victor Matemadanda owetheswa umlandu ofanayo.

UMatemadanda uthethwe emzini wakhe e Gokwe walethwa e Harare Central Police Station.

Sisolwe kakhulu lesi sehlakalo nguzulu eHarare okubalisa osaphethe isikhundla sokuba ngumgcinisihlalo enhlanganisweni ye Zimbabwe National Editors Forum ( ZINEF ),umnumzana Njabulo Ncube.

Usole lokwenza kukamongameli Mugabe ukuba,endaweni yokuzilalaela lezo zikhalazo ezivelele kulabo abalwa ipmi yenkululeko,ukhethe ukubahlukumeza,esenza lokho esebenzisa abanye abantu ukukhihliza inhlamba kulabo abazama ukumbonisa lapho izinto zingamanga kuhle.

Umkhokheli enhlanganisweni emela izifundi,ye Zimbabwe National Students Union, uMnu. Alistair Pfunye,uthi kulihlazo lokho osekusenziwa,ekhuthaza uMugabe kumele ngaye ulungisisa okukhalazwa ngabalwa impi yenkululeko laba,hatshi ukuba hlukumeza njengalokho osekusenziwa.

Ukubotshwa kwababili laba kuza ngemva kokuba umongameli Mugabe ebhubhudle igwebu emhlanganweni labalandeli bebandla lakhe le Zanu Pf ngolwesithathu ethuthukuthele phezu kwalabo abaloba lolugwalo ethi kumele bajeziswe kanzima.

Bobabili laba sebephathiswa ngamagqwetha enhlangfanisweni ye Zimbabwe Lawyers for Human Rights (ZLHR), njalo besetheswa umlandu munye,wokufuna ukuvukela uhulumende owakhethwa ngokusemthethweni kanye lokuthuka umongameli Mugabe.

please wait

No media source currently available

0:00 0:03:48 0:00
Lapho esitholakala khona

XS
SM
MD
LG