amalinks wokungena

Uzulu weZimbabwe Ukhalela eleCuba Ngokubhubha kukaCastro

  • Ntungamili Nkomo

Amazwe amanengi aqhubeka ethumela amazwi enduduzo kuzulu weCuba ngoMvulo kulandela ukufa kukaMnu Fidel Castro, yena owakhulula lelolizwe kuhulumende woncindezelo wazolikhokhela njalo okweminyaka eminengi.

UMnu. Castro ubhubhe ngoMgqibelo eseleminyaka yokuzalwa engamatshumi ayisitshiyagalolunye.

Waziwa ngokuphathisa amazwe amanengi asathuthukayo eLatin America lezwekazi leAfrica afana leZimbabwe ukulwela inkululeko egcweleyo.

Kodwa ubengathandwa ngamanye amazwe athuthukileyo afana leMelika ngoba embona njengontando kayiphikiswa obebusa ngodlame njalo encindezela uzulu welizwe lakhe.

UCatsro ungene embusweni ngo1959 ngemva kokugenqula uhulumende woncindezelo owayekhona wazotshiyela umfowabo uMnu. Raul Castro intambo zombuso ngo2008.

EleCuba lancedisa ukulolonga amabutho eZipra ngesikhathi sempi yenkululeko. Zinengi njalo izizalwane zeZimbabwe ezalolongwa kweleCuba ezigoqela ababalisi, abongi, odokotela labomanjilena.

Ubudlelwano lobu buyaqhubeka lanamuhla lokhu nanku odokotela labongi bakweleCuba behlezi besiza eZimbabwe ukuzephathisa ezibhedlela.

“UCastro wasincedisa kakhulu ngesikhathi sempi yenkululeko ngoba wayelobudlelwano obuhle loMnu Joshua Nkomo,” kutsho owayengumlweli wenkululeko ekuviyo leZipra uMnu. Max Mkandla.

XS
SM
MD
LG