amalinks wokungena

'Bhalisani Ukuvota Likhiphe iZanu PF Embusweni'

  • Mavis Gama

Izisebenzi ezitshengisela ezitaladini zikhonona ngesimo sazo.

Umkhosi wokunanza usuku lwezisebenzi, olwe Workers’ Day, owenzelwe eHarare ngoMvulo uphenduke waba ngumbuthano wezombusazwe ngemva kokuba inkokheli zamababandla aphikisayo kanye lenhlanganiso yeziseben eye Zimbabwe Congress of Trade Unions (ZCTU), bekhuthaze uzulu we Zimbabwe ikakhulukazi ontanga ukuba baphume ngobunengi ukuyabhalisa amagama abo kugwalo lwabazavota ngomnyaka ozayo.

Umkhokheli wenhlanganiso ye ZCTU, uMnu. Peter Mutasa, uthe impi yokulwela amalungelo ezisebenzi ngeyezombusazwe.

UMutasa ukhumbuze abantu ukuba lasekuqaleni yasungulwa yizisebenzi impi kazibuse ngesikhathi umuyi owake waba ngumsekeli kamongameli, uMnu. Joshua Mqabuko Nkomo, labanye bakhe, inengi kungababeqhatshwe ngu loliwe, babelwela amalungelo ezisebenzi.

Izisebenzi zithi zithwele nzima ngesikhathi kunanzwa usuku lwe Workers' Day.
Izisebenzi zithi zithwele nzima ngesikhathi kunanzwa usuku lwe Workers' Day.

Unobhala jikelele wenhlanganiso ye ZCTU, uMnu. Japhet Moyo, utshengise ukukhathazeka kwakhe ngokungazinikeli ukuguqula umthetho wezisebenzi, owe Labour Act, wona ole bill eliphathisa izisebenzi elethulwa edale lephalamande ngesikhathi sikahulumende womanyano.

UMoyo uthi kumdanisayo yikuthi uhulumende esengongenela kundaba zezisebenzi okutshengisea yikungxusa abantu ukuba baze emkhosini awenzele e Chinhoyi,yena engumqhatshi ikanti kumele kebe yizisebenzi ezikhokhela kule mikhosi yazo.

Owake waba ngumphathintambo wogatsha lwezisebenzi ngesikhathi sikahulumende womanyano, uNkosikazi Paurina Mupariwa, laye ulandise phezu kokunye kokumunyethwe yile bill elethulwa edale ngaleso sikhathi.

UNkosikazi Mupariwa uthe ukufuna ukukhokhela imkhosi yezisebenzi okwenziwa nguhulumende yikuziyenga nje ngoba izisebenzi zingesi ziwula.

Kade bekhona abaqhuba imisebenzi yokuzilibazisa kulomkhosi okubalisa uMandlenkosi Zulu, osakhulayo wakoBulawayo oleminyaka engamatshumi amabili lasikhombisa, kodwa esesebenzela eHarare.

Izisebenzi ziyakhala kwele Zimbabwe ...
Izisebenzi ziyakhala kwele Zimbabwe ...

UMnu. Morgan Tsvangirayi, umkhokheli weMDC-T, ubengumhlonitshwa kulomkhosi. UTsvangirai wake waba ngunobhala jikelele enhlangnaisweni yezisebenzi eye ZCTU.

Ugcizelele ngokuqakatheka kokuphatheka kukhetho oluzayo.

UTsvangirayi utshele lumbuthano ukuba kasoze avuma ukuqilibezelwa kwabamabandla azakube elobelane phansi izivumelwano zokusebenzalana ndawonye ama Memorandum of Understanding.

Umkhosi walonyaka wenziwe phansi kwendikimba ethi ‘FIGHTING UNEMPLOYMENT,POVERTY AND INEQUALITIES’.

Lumbuthano ungenwe ngabamabandla aphikisayo akumanyano weNERA, iziphathamandla ebezimele enhlanganiso yezisebenzi umhlaba wonke, eye International Labour Organisationa kanye lenkokheli zenhlanganiso ezisebenzelana lozulu lezifundi.

Uzulu uze ngobunengi kungakhathalekile ukuba imota zamapholisa ezithwala amanzi ababayo bezimiswe bucwadlana lalenkundla ye Dzivaresekwa.

Facebook Forum

XS
SM
MD
LG