UTinashe Rodrick Ncube waziwa ngegama lomsebenzi elithi FlowSick njalo uqale ukubhala inkondlo ngesikhathi efunda eGreenfield Primary School ko Bulawayo ngemva kokuba engene kumncintiswano owawuqoqwa yisikolo se Girls College.
"Lumncintiswano wawusiba khona minyaka yonke njalo labo ababesenza kuhle ezikolo ezehlukeneyo babesiyancintisana khona esikolo se Girls College. Mina ke ngahle ngaqala ukuthola imivuzo ngisase nguGrade 4.
UFlowSick uthe ekuphutsheni kwakhe izifundo esikolo se Milton High wasefundela ukupheka ezikolo ezibalisa eZDECO, eBulawayo Polytechnic kanye lase Pretoria kwele South Africa.
Uthole umsebenzi eHarare lapho ahlangane khona labanye bakhe babumba iqembu le 2 Sick 3 lona elilamalunga ayisithupha.
Iqembu le 2 Sick 3 liledlalade elilodwa elibizwa The 2 Sick 3 EP njalo uFlowSick uthi bekulidlalade elokuphembela ukuba bengamukelwa njani nguzulu.
"Idlalade leli silibize The 2 Sick 3 kuligama esilithethe ku code yelizwe le Zimbabwe ethi 263 kodwa thina sikuguqule kancane lokhu sizama ukukhombisa imidumo etshiyeneyo etholakala kwele Zimbabwe.
Abanye abaculi uFlowSick asebenzisane labo ekuphekeni lelidlalade ngabagoqela uEx-Mile, uSway The 3rd, uRicco Andrews kanye lo Langelihle Ndlovu njalo lelidlalade licindezelwe eSpinalong Studios esigodlweni iHarare.
Amanye amalunga eqembu le FlowSick and The 2 Sick 3 ngabalisa u BK otshaya ingungu, uStanley Stanley otshaya ikatali, uRicco otshaya ipercussion aphinde acule njalo babiza umculo wabo ngegama elithiwa yi Painted Poetry.
Imisebenzi yabo iyatholakala ebulenjini ku reverbnation laku soundcloud njalo uFlowSick uthi isifiso sabo ngesokuba baphume phandle beyetshaya kwamanye amazwe.
Baphume enkundleni ngengoma ethiwa Ngize Ngomsebenzi abayenze besebenzisana lo Langa Ndlovu.
