Linconywe okwamagama igigi labaculi bezokholo elisanda kuqhutshwa eHilbrow Theatre, eGoli.
Kuleli gigi abaculi bezokholo bathole ithuba lokutshengisa uzulu abadume ngakho. Bekudibene amaqembu ezomculo edlula itshumi lambili eHilbrow Theatre esethula inhlobonhlobo yonke yemiculo yezokholo.
Kuleli gigi ebeliqoqwe ngumculi wezokholo odumileyo uSis’ Thoe ozibiza Queen in Gospel ndawonye lenkampani yakhe eyeSizo Promotions kanye leye Ekhaya Neighbourhood Security, abaculi bangene bediyazela phezu kwekhaphethi ebomvu lobucwazicwazi bomceciso obusemaceleni.
Le yinto etshayelwe umpululu omkhulu njengoba bekungokokuqala kunengi labo ukuhlonitshwa ngaloluhlelo. Kwazise leligigi belixubene lezikitazisayo ebezivela kumemezeli uDJ Nyonis.
Impumelelo yeliligigi ilethe intokozo enkulu kuSis’ Thoe. Kwathi umculi odumileyo kwezomdumo weRhumba uMartin Sibanda oweNdolwane Super Sounds, obengumhlonitshwa kuleli gigi laye ubatshayele ihlombe abezokholo.
Inhlobonhlobo yezomculo ebisethulwa kuleli gigi yiyo ethathekise abanengi. Bezikhona ezizothileyo. Bekukhona ezabomskandi. Besekusiba khona ezesicathamiya.Kantike bezikhona abeziqala zize ziyephela abantu bedlalazela. USis’ Thoe ethi leli sekuzakuba ligigi leminyaka yonke.
Amaqembu abeyingxenye yalo umcimbi agoqela elakhe uSis’ Thoe, Izwi Lesiphelo, Sisters of Paradise, Izingilosi zezulu, New culture, Chosen brothers, Patie Madonzo, Abantwana beNsindiso, Isizwe esimnyama lamanye.