amalinks wokungena

Kuliviki kuWoza Friday Sileqembu Lomculo eleTshongokwe Masters

  • Joseph Njanji

Umculi uPrince Danisa weTshongokwe Masters

Umculi uPrince Danisa weTshongokwe Masters

Kuluviki, kuhlelo lweWoza Friday sileqembu lomculo ele Tshongokwe Masters lona elisanda kuhwatsha idlalade lalo lesibili eliphansi kwesihloko esithi Ihlongangandlebe.

Leli dlalade lilandela abalikhuphe nyakenye elithiwa Sekuf’umuntu njalo umkhokheli waleliqembu uPrince Danisa uthi lemukelwe ngezandla zombili nguzulu olandela umculo wabo.

“Abantu bayalijabulela kakhulu endaweni esesihambe kuzo njalo ensukwini ezedluleyo sike safika Esigodini satshiya abantu bekholisa kakhulu.”

Idlalade leli elithiwa Ihlongandlebe licindezelwe eHouse of Rising Sound besebenza ndawonye lo Joe Maseko njalo lilengoma eziyisithupha ezibalisa ethi Ihlongandlebe, We Mkami, Buz’ebuthongweni, Isiphiwo Sami, Omalukazana kanye lethi Ukufa.

Amalunga eqembu le Tshongokwe Masters adabuka esigabeni seLupane okwenza baziwe kakhulu ngegama lokusoma elithi Iziqholo zaseLupane.

UPrince Danisa oleminyaka elitshumi lathoba munwe munye eyokuzalwa nguye obhala ingoma eziculwa yileliqembu njalo uthi ubhala ngezehlakalo ahlangana lazo empilweni.

“Yimi engizibhalayo ingoma esizihlabelayo njalo ngiyabe ngibona into ezenziwa ngabantu. Njengakungoma ethi ihlongandlebe ngiyabe ngibone abanye abantwana abangamakhikhitha lapho abahamba khona abantu baze bakhulume ngabo lami ngibe sengitshela uzulu ukuba ihlongandlebe ngumuntu onjani.”

Amanye amalunga eqembu ngagoqela uSufficient Mkhwebu odabuka eSt Paul khonale eLupane odlala ilead guitar, kukhona njalo uLawrence Moyo ovela eDete odlala irhythm guitar kuthi otshaya ama drums bambiza uMr Ceremony.

UPrince Danisa yena nguye okhalela ingoma aphinde njalo atshaye le bass guitar.

XS
SM
MD
LG