amalinks wokungena

'Amadolobho eZimbabwe Abhidlizwa Ngezombangazwe'


Kugcwele ingcekeza emangalisayo eHarare.

Amadolobho amanengi eZimbabwe asalela emuva kwezentuthuko ukuba abe kusimo esilingana lawakwamanye amazwe emhlabeni wonke jikelele ngenxa yokuxokozela kwezombusazwe.

UMnu. Mfundo Mlilo, umqondisi wenhlanganiso ye Combined Harare Residents’ Association (CHRA), lezinye ingcwethi ezibona ngezamabolobho, zethule umbiko lo ngesikhathi amadolobho emhlabeni wonke enanza ilanga lokuthuthuka kwawo ukufika kusimo se World City Status.

UMlilo labanye bakhe bathi kukhona njalo okunye okwenza okwehlula ukuthi eZimbabwe kube lamadolobho athuthukileyo.

Omunye wengwethi lezi ngumgcinisihlalo wenhlanganiso ye Harare Residents Trust, uMnu. Albert Mazula, othi lokhe amadolobha awe Zimbabwe ekhatshana kulesisimo nxa kukhangelwa indlela adlelana ngayo lozulu, ukuswelakala kwamanzi, imigwaqo egcwele amagodi lamadamu amanzi angakhangelwa ngemfanelo.

Izakhamizi zihlala zikhonona ngendubo ezinjalezinye kuziphathamandla.

Ocubungula ngezombusazwe, uMnu. Rejoice Ngwenya, uthi idolobho ukuba libe kuzinga eliphezulu, lilokuthile okumele likunanzelele okukhanya kungasenzakali eZimbabwe.

Ingcwethi kwezokuhlelwa kwamadolobho amaTown Planner zithi udubo olukhulu yikungenela kwabezombusazwe lokuhlaliswa kwabantu endaweni ezingafunwa ngukhansili.

Ingcwethi ezisebenzela ikhansili yeHarare zithi leli dolobho liyaqhubeka ngemizamo yalo yokulwela ukuba yi World Class City ngo2025 lisebenzisa indlela yama ‘Hundred Day Plan’ phansi kwama khomithi aphatheka emisebenzini etshiyeneyo efana lokuthwalwa kwabantu, amanzi, ezempilakahle, ukuthwalwa kwezibi lemithetho yamadolobho.

Zithi abahlaliswa okungekho emthethweni bazasuswa loba kungathatha isikhathi eside kubangelwa yikuphuza kwemithethwandaba ukulungisa udaba lolu.

Amadolobho amanengi akhala ngokuthi kulokungenela kwabaphathintambo ababona ngokubuswa kwezabelo kumisebenzi yabo bexotsha iziphathamandla eziqakathekileyo ezikhundleni.

Umphathintambo wezokubuswa kwamadolobha, uMnu. Saviour Kasukuwere, uhlala esithi akula nkethabetshabi ekuhlalisweni kwabantu endaweni ezitshiyeneyo emadolobheni eZimbabwe.

XS
SM
MD
LG