amalinks wokungena

Amalunga eMDC-T Asola Isivumelwano Esilotshwe NguTsvangirai loWelshman Ncube


UMnu. Morgan Tsvangirai.

UMthwakazi wamukele ngokuthandabuza esithi kukhona okutshaya amanzi kuzivumelwano zokusebenza ndawonye ezilotshwe nguMnu. Morgan Tsvangirai webandla leMDC-T lo Nkosikazi Joyce Mujuru weNational People’s Party kanye loMnu. Welshman Ncube welinye lamacele eMDC.

Abantu abanengi bathi ukulobelana izivumelwano ngundlu kukaMujuru, uNcube loTsvangirai akuthembisi ukuthi kuzaba lokubambana koqobo kumabandla la aphikisa elibusayo eleZanu PF.

Amalunga ebandla le MDC-T koBulawayo akhala ngokuthi kabazwisisi ukuthi isivumelwano lesi sizaqhutshwa njani njalo sizaqalisa ukusebenza nini.

Bathi inkokheli yebandla leli kayikhulumi labo ngalokhu.

Isakhamuzi sakoBulawayo, uNkosikazi Zinhle Moyo, uthe okwenziwe nguNcube kuyadanisa.

Uthe kuveza ukungahleleki kwakhe ngoba usengene kuzivumelwano zokusebenzelana ezinengi.

UNkosazana Silethemba Mathe, esinye njalo isakhamuzi sakoBulawayo, uthe izivumelwano lezi ezijonge ukusebenzelana kwamabandla aphikisayo kungani zilotshwa ngezikhathi ezehlukeneyo ngakho-ke kukhombisa ukuba kukhona okungahlelekanga kuzo.

Umgcnisihlalo weZAPU esabelweni seMatabeleland South, uMnu. Matthew Sibanda, laye uthe udideke ingqondo ngokwenza kukaNcube ngoba ukumbuthano weCoalition of Democrats usephinda njalo elobelana loTsvangirai, okomunye umanyano weNational Electoral Reform Agenda.

UMnunzana Sengezo Tshabangu yena uthe kuhle lokhu abayenzileyo kodwa kukhona okutshaya amanzi amnyama ngoba ingwalo zeziqondiso zezivumelwano kazikatshengiswa uzulu.

Umongameli weAlliance for National Salvation, uMnu. Moses Mzila Ndlovu, uthe amabandla alelungelo lokuzikhethela lawo afuna ukusebenza lawo kodwa ngokumazi kwakhe uTsvangirai akathenjwa.

UMzila Ndlovu uthe ubona engani ibandla likaTsvangirai seliginye elikaNcube.

Abantu basele bebambe owangaphansi ngezivumelwano zokusebenzelana ezilotshwe kuyonale iviki besithi zizatshiya abanye bedanile ngoba uTsvangirai nguye yedwa owaziyo okumunyethwe yizo okungaba yikubabophanisa imisila.

Isikhulumeli seMDC, uMnu. Kurauone Chiwayi, wethule umbiko ngoLwesine ekubeka sobala ukuthi lokhe bekunhlanganiso yeCODE.

Uthe bawabikele amabandla abasebenza lawo kunhlanganiso le ngokuyadlelana loTsvangirai.

Facebook Forum

XS
SM
MD
LG