amalinks wokungena

Abalandeli beBosso Banika iHighlanders i$500 Yokubhadala Isigwebo Esizakwethulwa yiPSL

  • Joseph Njanji

Abalandeli beqembu leHighlanders bavalisa umdlalo weqembu leli leDynamos ngeSonto eBF.

Iqembu lenguqu ele Highlanders selithole amadola angamakhulu amahlanu ($500) adingwe ngabalandeli baleliqembu abathi yibo abazahlawula imali ezabhadaliswa leliqembu ngemva kokuba abanye babo bevuse umsindo okwenze umdlalo obuphakathi kweqembu labo lele Dynamos ungasafiki emaphethelweni ngeSonto edluleyo.

Isiphathamandla seqembu le Highlanders, uNhlanhla Dube, utshele intathelizindaba ukuthe ngoLwesine bathole amadola edlula amakhulu amahlanu ephandwe ngabandeli beqembu leBosso abakuleli kanye lasemazweni atshiyeneyo.

“Kuthe sifika kuhola eletshumi lamhlanje imali ebesesiyitholile ingaba phezulu mbijana kwamakhulu amahlanu. Imali le kayiveli kubasekeli abakuleli kuphela kodwa ivela laphetsheya emazweni avele esaziwa ukuba kulabantu bakuleli abahlala khona kanye lakwamanye amazwe ebesingawacabangeli agoqela iRwanda leSomalia.

Abalandeli beqembu le Highlanders baqale uhlelo lokubuthelela imali ukuze bephathise leliqembu ukuba lenelise ukubhadala inhlawulo ekhangelelwe ukuba igaxwe leliqembu ngemva kokuba abanye abalandeli bedale ukuba umdlalo obuphakathi kwaleliqembu lele Dynamos ungafiki emaphethelweni ngeSonto edluleyo.

Abalandeli babekhonona ngokusebenza kukamsekeli kanompembe, uThomas Kusosa, yena abamethese umlandu wokungaphakamisi iflegi yakhe ngesikhathi umgadli uChristian Epoupa elinganisela iqembu leDynamos sokuzaphela ihlandla lakuqala elomdlalo njalo lumdlalo awusaqhubekelanga phambili ngoba abalandeli besebexotsha uKusosa emzileni wenkundla.

UDube uthe ukwamukela usizo oluvela kubalandeli akutsho ukuba bayavumelana lezenzo zobudlwangudlwangu njalo iqembu alisiyo ngxenye yenhlelo zalabo ababuthana ngaphansi kwesitsho esithi #Asifunibumbulu.

We don’t take chances. Asiyigadi ihamba, asizisikeli ehwahweni, asisini lapho esinganxuswanga khona. Yikho-ke awusoze usibone siyiyeqela igijima fanekhaya, sizahlangana layo erenkini.”

Inhlanganiso ye Premier Soccer League yethese iqembu le Highlanders umlandu wokwehluleka ukulawula abalandeli balo ngemva kokungafiki emaphethelweni komdlalo wangeSonto njalo icala leli likhangelelwe ukuthonisiswa ngoLwesibili mhla zingamatshumi amabili lantathu kuyonale inyanga kaNkwenkwezi.

Kusenjalo namhla emini iqembu le ZPC Kariba linqobe ele CAPS United nge 2 ka 1 emdlalweni we Premier Soccer League odlalwe namhla emini enkundleni yeNyamhunga.

Facebook Forum

XS
SM
MD
LG