amalinks wokungena

'Akufakwe Ucingo Lwegetsi Emgceleni weBotswana leZimbabwe'

  • Martin Ngwenya

FILE: UMongameli Ian Khama loMongameli Robert Mugabe besemhlanganweni weSADC eMaputo, Mozambique, ngomnyaka ka2013. (AFP)

Elinye ilunga ledale yephalamende kwele Botswana elebandla elibusayo lithi kumele uhulumende wakhe afake ucingo lomlilo kagetsi phakathi kweZimbabwe leBotswana.

Uthi lokhu kunganqabela ukumemetheka komkhuhlane wenkomo womlomo lamasondo.

Kodwa abanye abantu beZimbabwe babona lelinyathela njengendlela yokwenqabela ukungena kwabantu eBotswana beseqa umngcele okungekho emthethweni.

UMnu. Samson Guma-Moyo ucele uhulumende wakhe ukuthi avuselele ukufaka ucingo lolu esithi sebekhathele ngezifuyo ezingena zivela eZimbabwe eziletha umkhuhlane womlomo lamasondo.

UGuma-Moyo, ngomdabu ophuma kwele MaNdebeleni eZimbabwe, uthi eleZimbabwe alizimiselanga ukuvimba izifuyo ukuthi zingene eBotswana, ngakho-ke ilizwe lakhe alingeke lithwaliswe nzima ngabantu abenza santando.

Kodwa abanye abantu bathi le kungaba yindlela njalo yelizwe leBotswana ukuthi livalele phandle abeZimbabwe abaqhubeka bethululeka ngobunengi bengena eBotswana, bexotshwa yisimo somnotho esilukhuni ekhaya.

Omunye wabakhonona ngalokhu nguMnu. Andreas Sibanda othi ilizwe leBotswana kumele linanzele udaba lokufaka ucingo olulomlilo kagetsi, ngemva kokuthi kube lokuthukuthela eminyakeni edluleyo lapho iBotswana eyayizana ukwenza okufanayo.

“Linyathela elingavusa okunengi. Siyakhumbula ukuthi esikhathini esidluleyo, eleZimbabwe lathi akulanto enjengokuthi iBotswana ifuna ukwenqabela inyamazama, kodwa ifuna ukuvalela abeZimbabwe ukuthi bangangeni.”

Isizalwane seBotswana, uMnu. Casper Ramokone, uthe laye kavumelani lokufaka ucingo olulomlilo kagetsi ngoba amazwe womabili alobudlwelwano obuphezulu njalo abantu balakho ukubhidliza ucingo lolu.

“Lokhu yikuchitha isikhathi ngoba abantu balezihlobo ngapha langapha komngcele, njalo izifuyo bezihamba kungela nkinga phakathi kwamazwe womabili. Uhulumende (weBotswana) uzabedlalisa imali ngoba abantu balakho ukulubhidliza ucingo lwakhona.”

Okwakhathesi iBotswana iyadubula inkomo zeZimbabwe eziyeqa umngcele, inyathela eselitshiye abalimi beqhinqa isililo.

UGuma-Moyo ngummeli wedale lephalamende leTati East, engcelelane leZimbabwe duze leFrancistown, njalo ukewaba ngumgcinisihlalo webandla elibusayo leBotswana Democratic Party.

Ungomunye ababikwa bekhangelelwe ukuthatha isikhundla sokuba ngumsekeli kamongameli ngomnyaka ozayo, ngesikhathi umongameli Ian Khama esehla esihlalweni.

Facebook Forum

XS
SM
MD
LG