amalinks wokungena

Breaking News

Uzulu Uthakazelela Amazwi kaKhama Ofuna uMugabe Asuke Embusweni


Izizalwane zeZimbabwe ezihlala eBotswana
Izizalwane zeZimbabwe ezihlala eBotswana

Izizalwane zeZimbabwe ezihlala eBotswana zamukele amazwi kaMongameli Ian Khama ocebise uMongameli Robert Mugabe ukuthi asuke embusweni ngoba engaselamandla okukhipha iZimbabwe kungxaki ezithola iphakathi kwayo.

Kodwa zithi uMongameli Mugabe kasoze atshaye ndiva amazwi kaMongameli Khama.

Ekhuluma lentathelizindaba yeReuters kuyonale iviki, uMongameli Ian Khama Seretse Khama uxwayise uMongameli Robert Mugabe ukuthi njengoba iminyaka isihambile, kayehle esihlalweni.

Udaba Esilethulelwe NguMartin Ngwenya
please wait

No media source currently available

0:00 0:02:39 0:00
Lapho esitholakala khona

UMongameli Khama uthi iZimbabwe ilayo eyinye inkokheli elamadlabuzane engakhipha ilizwe kungxaki zayo ngesikhathi umumo womnotho usiya usonakala ngamandla.

Uthi ukuma manzonzo kwesimo eZimbabwe sekudale ukuthi amazwe afana leBotswana kanye leSouth Africa, athwale nzima ngezilalwane zeZimbabwe ezibalekela kumbe ziphele kumazwe la.

UMongameli Khama uthi sekunzima ngitsho lokuthengisa ilizwe lakhe ukuthi likhange izethekeli eziletha imali ngenxa yegama elingcolileyo leZimbabwe.

UKhama uyaziwa njengabomongameli abalutshwana kuzwekazi leAfrica abangesabi ukuchothoza uMugabe yena okhangelwa njenge ntaba kayikhonjwa kunengi.

Kodwa ezinye izizalwane zeZimbabwe ezihlala kweleBotswana abafana loMncedisi Sibanda bathi uMugabe ulakho ukungalaleli okukhulunywa nguKhama.

“Siyakwamukela okutshiwo nguMongameli Khama ngoba ngemva kokutshengisela kwethu njengabeZimbabwe, akulankokheli kwamanye amazwe esisekeleyo (ukuthi uMugabe ayehle esihlalweni). Inkinga yikuthi uMugabe kasoke alalele ngoba enguntando kayiphikiswa.”

Ezinye izizalwane zeZimbabwe ezihlala kwele Botswana.
Ezinye izizalwane zeZimbabwe ezihlala kwele Botswana.

OweZimbabwe osebenza eGaborone uHopewell Dube uthi uKhama, ozakwehla esihlalweni ngo2019, ebesitsho imbono yakhe ngakubona kuzandaba ezimqoka kumbuso wakhe.

“Lokhu kutshengisa ukuthi uMongameli Khama njengomuntu uzatshiya umbuso ngo2019, usekhuluma okusenhlizweni yakhe njalo uyehlukana lombono we SADC kanye le Africa, ngendlela abona izinto ngayo.”

UMnunzana Admire Dewa uthi umbiko kaKhama utshengisa indoda elesibindi njalo engadondi ukukhuluma ekubona kufanele.

“Amazwi la atshengisa ukuthi uKhama uyakhathazeka ngokwenzakalayo ngoba nguye yedwa ome wakhuluma ngezenzo zikaMugabe.”

UKhama uthi kulabeZimbabwe abaseBotswana abadlula inkulungwane ezilikhulu (100,000) okungumthwalo onzima elizweni lakhe elilabantu abayizigidi ezimbili.

UMugabe ukhangelelwe ukuphendula, noma ngendlela elokuthethisa kanye lokuntela, kumazwi kaKhama wokuthi uselekhehla eligasamelanga libe lilokhe libusa.

XS
SM
MD
LG