amalinks wokungena

'Tshiyani Umkhuba Wokuhlukumeza Intathelizindaba'

  • Mavis Gama

Intathelizindaba zithi kumelemithetho ebancindezelayo.

Uhulumende, abenhlangothi ezitshiyeneyo lozulu jikelele, bakhuthazwa ukuba behlukane lomkhuba wokuhlukumeza intathelizindaba ngesikhathi ziqhuba umsebenzi wazo kakhulukazi nxa kusenziwa ukhetho lwelizwe lonke.

Inkuthazo le yethulwe zingcwethi kwezokwethulwa kwendaba ngesikhathi kulungiselelwa ukuthakazelela usuku oluqakathekisa intathelizindaba olwe World Press Freedom Day.

Lokhu kuphume emhlanganweni wabezindaba oqoqwe yinhlanganiso ye Media Institute for Southern Africa (MISA Zimbabwe) owenziwe ngoLwesibili eHarare obuhlolisisa imithetho eyethulwa nguhulumende lelungiswayo ehambelana lokwenziwa zithathelizindaba.

Uhulumende wethula eminye imithetho enjenge Access to Information and Protection of Privacy Act le Public Order and Security Act ngenjongo yokunqabele ukukhahlamezwa kukazulu lokunye okufanayo.

Lumhlangano uveze sobala ukuba ziyaqhubeka izehlakalo zokuhlukumezwa kwalezintathelizindaba nguhulumende, abezombusazwe kanye lozulu ngokwakhe, ngoba zikhangelwa ngelihlo elibi lezintathelizindaba.

Ezinye zilamanxeba alokhu kuhlukunyezwa, zikhona njalo esezithe zalahlekelwa yimpilo ziphakathi kokuqhuba umsebenzi wazo.

Umqondisi enhlanganisweni ye MISA, uMnumzana Nhlanhla Ngwenya, uthi zikhona indlela ezilokuhlakanipha zokukwenqabela lokho ezingasetshenziswa yintathelizindaba.

Uthi okunye yikuloba indaba kungasetshenziswa inhlangathi ezithize.

UNgwenya uxwayisa njalo lezintathelizindaba ukuba zibozinakekela zona ngokwazo nxa ziqhuba imisebenzi yazo, zazi lamanyathelo okumele ziwathathe zingahlukunyezwa.

UMnu. Nkululeko Sibanda, eyinye yentathelizindaba eZimbabwe, uthi okumele kwaziwe nguzulu wonke yikuba umsebenzi wokuthapha lokusabalalisa indaba umqoka ngoba uphathisa ukuthuthukisa ilizwe.

Sezileminyaka ethize intathelizindaba eZimbabwe zikhalaza ngemithetho elukhuni.

Facebook Forum

XS
SM
MD
LG