amalinks wokungena

Amankampani Akwele Botswana Abukisa Impahla eZITF

  • Martin Ngwenya

Manengi amazwe aphatheka lonyaka kumbukiso weZITF 2017.

IBotswana ithumele amakampani alitshumi lanye ukuthi ayebukisa embukisweni omkhulu wezamabhizimusi owe Zimbabwe International Trade Fair (ZITF) oqale koBulawayo ngoLwesibili.

EleBotswana lithi libona kulamathuba amabhizimusi okuthengisa imphahla eZimbabwe.

Ugatsha luka hulumende olubona ngezokuthuthukisa amabhizimusi olweBotswana Investment and Trade Centre (BITC) luthi kulamathuba amahle kumakampani eBotswana okuthi athengise imphahla eZimbabwe.

IBITC ithi ihlonipha umbikiso weZITF ngoba nyakenye kuphela wahuga amakampani adlula angamakhulu ayisithupha lengxenye ephuma emazweni alitshumi lasithupha.

Isikhulumi seBITC, unkosazana Kutlo Moagi sithi amakampani aweBotswana asembukisweni weZITF alakho ukubumba ubudlelwano lamanye amabhizimusi akwamanye amazwe.

UMoagi uthi iBITC yenzisisa uphenyo olwatshengisa ukuthi kulomkambo wemphahla zeBotswana kunhlangatho ezitshiyeneyo eZimbabwe, okugoqela ukuphekwa kwemphahla -imanufacturing, ezokwakha, ezokudla, igwayi kanye lemphahla eyenziwa ngezikhumba.

OweZimbabwe, uMnu. Stanley Ncube, oseGaborone, uthi ukubukisa kwamakampani avela eBotswana yisitshengiselo ukuthi iZITF ilokhe ilesithunzi noma nje ezomnotho zingamanga kahle ekhaya.

Kuyatshengisa ukuthi noma nje umumo womnotho uphansi, amanye amazwe lokhe ehlonipha umbikiso weZITF, njalo, kutshengisa ukuthi ngabe zonke izinto zikahle, amathuba okuthuthukisa amabhizimusi akhona.

IBITC ithi ukubukisa kwamakampani eBotswana kuqakathekile ngoba kuqinisa ubudlelwano kwezamabhizimusi phakathi kwamazwe womabili.

Ekuqaleni komnyaka, iBotswana yathi izimisele ukuphinda kabili inani lemphahla eyithengisela iZimbabwe emi kuzigidi ezingamakhulu zamadola okwakhathesi.

Facebook Forum

XS
SM
MD
LG