Umculi wengoma ze-Afro Jazz, uMelusi Khumalo, useyethule idlalade elitsha.
Idlalade elitsha elika Khumalo yena owaziwa kwezomculo ngelithi Mel limumethe ingoma ezinhlanu njalo ulethe igama elithi Mina.
OkaKhumalo uthi yena lelidlalade likhuluma ngohambo lwakhe kwezomculo zona aziqale ngesikhathi eleminyaka elitshumi lesithupha eyokuzalwa.
“Idlalade leli likhuluma ngempilo yami, ngohambo esengiluhambile kwezomculo. UMina uzananzelela ukuthi yimbali kumbe ngingathi ngikhuluma ngempilo yami ukuthi ngiqale njani, kusiyangaphi njalo yizinto ezinjani engihlangane lazo empilweni yami.”
Ingoma ezitholakala kulelidlalade ngezigoqela yona okubizwa ngayo idlalade ethi Mina, kukhona njalo ethi Uvalo, ethi Langelihle, uJesu Liqhawe, kanye lethi Village Boy.
Idlalade leli elithi Mina lilandela elikhutshwe ngomnyaka ka 2013 elithiwa Uthando.
Ekuphekeni idlalade lakhe leli uKhumalo usebenze labaculi abagoqela uSam Tsatsi, obetshaya ibass, uAntony Gaseni obetshaya ilead guitar, uCourtney Antipas obetshaya ama drums, kuma keyboards bekulo Nqobile lo Jerry kuthi yena uMel nguye obekhalela ingoma evunyelwa ngu Martha lo Privilege Cement.
Idlalade licindezelwe nguAntipas kanye lo Jerry Spirit Fingers.
