Asenciphile amathuba eqembu labesifazane elimela ilizwe emdlalweni wenguqu awokudlulela esigabeni esilandelayo esomncintiswano we Africa Women Cup of Nations ngemva kokuqilibezelwa elikwenziwe ngabonompembe ngoLwesibili ntambama lapho elinqotshwe khona nge 1 ka nya liqembu leEgypt.
Liqilwe okusegcekeni iqembu lama Mighty Warriors lapho umsekeli kanompembe eyale ibhola elithelwe emambuleni nguFelistas Muzongondi ebelizakwenza ukuba umdlalo uphele zingutshiki lobhanqa 1 ka 1 amankazana eZimbabwe ethole umklomelo owodwa.
Aluba leli goli lingazange liyalwe iqembu lama Mighty Warriors belizayala lilokhu lilamathuba amahle awokudlulela kusigaba esilandelayo esomncintiswano lo oqhutshelwa elizweni le Cameroon.
Umdlali weqembu le Mighty Warriors uRudo Neshamba, yena ongahambanga eCameroon ngoba elimele, uthi iqembu leZimbabwe lidlale kuhle kodwa liphazamiswe yikukhathala sekulihlandla lesibili elomdlalo.
“Ama Mighty Warriors adlale kuhle ikakhulu nge first half bebesenelisa ukupasana ibhora besukela emuva njalo bathole amathuba amanengi okuhlohla kodwa behluleke ukuwasebenzisa sakujeziselwa ke khonokho.
“Ngehlandla lesibili amaqembu wonke abesediniwe kodwa abeGipite benelise ukwala bedlala ibhola lokupasana ikanti thina sithe sesikhathele sabavumela ukuba bevule izikhala kumvimbi zethu bacina besenelisa ukuba behlohle.”
Komunye umdlalo wesibaya sika Group A odlalwe phambilini komdlalo weqembu le Zimbabwe lele Egypt iqembu le Cameroon linqobe ele South Africa nge 1 ka nya.
Limpumela itsho ukuba iqembu le Cameroon yilo elihlezi phezu kwengalane lilemiklomelo eyisithupha okutsho ukuba noma kanjani selizakuyadlala kusigaba se semi-final.
Iqembu le Egypt lihlezi endaweni yesibili engalaneni yesibaya sika Group A lilemiklomelo emithathu kuthi iqembu le South Africa lele Zimbabwe alomklomelo owodwa iqembu ngalinye.
Iqembu le South Africa lizadlala lele Egypt ngoLwesihlanu mhla zingamatshumi amabili lanhlanu kunyanga kaLwezi kuthi iqembu le Zimbabwe lizadlala lele Cameroon.
Loba nje sekungasekho emandleni eqembu lase Zimbabwe ukuba lidlulele kusigaba esilandelayo esomncintiswano, uNeshamba uthi kumele leliqembu lidlale lijonge ukunqoba.
“Ibhola ehlohlwe ngu Felistas Muzongondi bekungelanto embi ngayo ngoba ubengekho off-side kodwa kutsho bekungasilo langa lethu. Sibafisela inhlanhla emdlalweni wabo leqembu le Cameroon njalo kuzamele basebenze ngamandla ngoba kumele banqobe loma kanjani.”
Iqembu le Zimbabwe kumele linqobe ele Cameroon ngamagoli ambalwa libe selithandazela ukuba umdlalo ozadlalwa phakathi kweqembu le South Africa lele Egypt uphele zingutshiki lobhanqa njalo kungaba kuhle nxa zingahlohlananga ukuze ele Zimbabwe lidlulele phambili.
Indlela iqembu le Zimbabwe elidlala ngayo iyatshengisa ukuba leliqembu alenzanga amalungiselelo ayeneleyo njengoba lihlanganiswe sekusele amaviki amabili kuphela ukuba libhekise amabombo kwele Cameroon.