amalinks wokungena

Breaking News

UMfundisi 'Owatshaywa Ngamapholisa' Walimala Uhlolwa Ngamadokotela


Pastor Phillip Mugadza
Pastor Phillip Mugadza

Amagqwetha alwela ilungelo loluntu awenhlanganiso yeZimbabwe Lawyers for Human Rights (ZLHR) athi usehanjiswe esibhedlela seParirenyatwa uMfundisi Patrick Mugadza owatshaywa engakabotshwa ngamapholisa ngoLwesibili ngesikhathi etshengisela ezitaladini eHarare ekhonona ngombuso kaMongameli Robert Mugabe.

Inhlanganiso le ithi inkinga esikhona okwamanje yikuthi uMugadza katholi imithi yokumelapha.

Igqwetha likaMfundisi Mugadza, uMnu. Gift Mtisi, utshele intathelizindaba ukuba lokhu kuze ngemva kokuba abenhlanganiso yakhe ilobele amapholisa isithi ifuna ukuthi avunyelwe ukuyakwelatshwa ngemva kokutshaywa walimala kakubi.

UMugadza utshaywe ngamapholisa asebenzela edale lephalamende lapho akade ezibophele khona ngamaketani ensimbini duzane leAfrica Unity Square efuna ukutshumayela ngobubi bombuso kaMugabe.

Wetheswe umlandu wokubangela abantu umsindo ngaphansi komthetho we Criminal Law (Codification and Reform) Act.

Omunye wabaphatheke emikhankasweni yokulwela ukulethwa kombuso uqobo, uMnu. Charles Nyoni, usole kakhulu ukubotshwa kukaMfundisi Mugadza.

uMugadza kasamiswanga phambi komthethwandaba ngoLwesithathu njengalokho obekukhangelelwe. Amapholisa aveze ukuba uzamiswa phambili kukamantshi mhlaka 24 ngoLwezi.

Lokhu sokungokwesibili ebotshwa uMugadza kungakapheli iviki.

Uke wabotshwa njalo ngolweSihlanu olwedluleyo eAfrica Unity Square ngemva kokutholakala elengise iflag ye Zimbabwe entanyeni engazange aqala athola imvumo kuhulumende njengalokho okutshiwo ngumthetho olawula lokho.

Ekumisweni kwakhe phambi komthethwandaba Ngomgqibelo, mhlaka 19 Lwezi, umantshi Vakayi Chikwekwe, umhlawulise amatshumi amahlanu amadola - $50, yesibambiso.

XS
SM
MD
LG