Ibandla le Zanu PF lithi ngamanyala akhulunywa ngezinye izizalwane zeZimbabwe ezithi inhlanganiso yamazwe ezansi yezwekazi leAfrica eyeSouthern African Development Community (SADC) kumele ilungise okuhluphayo eZimbabwe.
Abalandeli bebandla leli abagoqela uMnu. Farai Muvuti loMnu. Effort Nkomo bathi abahluphayo ngabaphikisa uhulumende kaMongameli Robert Mugabe abafuna ukumkhipha esikhundleni.
UMuvuti loNkomo bathi abantu abatshengisela ezitaladini eZimbabwe yilabo asebehluphe okwesikhathi eside abasemadolobheni abavele bezonda ibandla elibusayo.
UNkomo uthe, “Umbono wami yikuthi eZimbabwe kulabantu abahlakaniphileyo kakhulu abazi ukuthi nxa kuluhlupho bakhulumisane lalulungise bengakabizi owangaphandle. Angazi ukuthi ubukhokheli bonke bamabandla ayehlukeneyo bebeyehlulekile yini ukuthi kukhulunyiswane ngodubo obukhona.”
Kodwa-ke ingcwethi kwezombusazwe, uDokotela Nkululeko Sibanda, owe Huddersfield University, uthe iSADC kumele ilungise konke okuhluphayo eZimbabwe.
“Limqotho lelo elithi iSADC kumele ingenele nxa kulobudlwangudlwangu obuqhubekela phambili.”
UMongameli Robert Mugabe kade esemhlanganweni weSADC wawutshiya ungakapheli esiyadinga uncedo esibhedlela eDubai.
