Lanxa umsebenzi ubuqhubeke eHarare njengenhlalayenza, izitolo ezinengi ziphuzile ukuvula kwathi amapholisa agcwele indawana yonke phakathi kwedolobho lasemizini ehlala uzulu.
Abaqoqe ukutshengisela kwango Lwesithathu kokungezi edolobheni, abe Tajamuka-Sesijikile Campaign, bathe kuphumelele ngoba uzulu wethuselwe ngamapholisa.
Uqhubeke ngemisebenzi yakhe uzulu ophila ngokuthengisa impahla ezindala, emikambo eyehlukeneyo yeHarare, okugoqela esilindweni samabhasi esiku Fourth Street.
Lanxa bekuvuliwe edolobheni bekungasi kwensukuzonke njengoba abantu kade bebalutshwana kakhulu nxa kuqathaniswa lokwezinye insuku zaphakathi kweviki njalo kuyikuphela kwenyanga.
Amapholisa kade egcwele ndawana yonke ikakhulu lapho ukuzulu achitha khona isikhathi eAfrica Unity Square kanye lesigodlo sikamanisipala eTown House.
Abaqoqe lumkhankaso, abeTajamuka-Sesijikisile bathi akubamangalisi ukungena kwabantu edolobheni ngoba bebevele beyethuselwe osomabhizimusi ngaphambilini ukuba bazothathelwa ama licence abo nxa bengalandela inkuthazo yokutshengisela.
Uzulu emalokitshini wethuselwe kakhulu wahle wesaba ngoba etshayiwe emkhankasweni edluleyo emizini ebalisa eHatcliff, Kuwadzana, Highfields, Dzivarasekwa, Mufakose le Glen Norah.
UMnumzana Mxolisi Nduna oyisakhamuzi seHarare uthe okungani kuphazamise ukuphumelela komkhosi lo yikuswelakala kobukhokheli ukuze kuphumelele.
Wengeza uNduna esithi eyinye imbangela yikuba inengi labantu kalilamsebenzi.
AbeTajamuka-Sesijikile bathi bazoqhubekela phambili ngemikhankaso yokutshengisela ngendlela ezehlukeneyo.
Kulimele osakhulayo oyedwa kwabotshwa abathathu emzini weGlen Norah, lapho okuqhamuke khona udlakela amapholisa exotshanisana labakade betshengisela.
Kuqhamuke udlakela njalo emzini weHatcliff lapho abasakhulayo abaphazanyiswe ngamapholisa ekutshengiseleni kwabo.