UMnu. Themba Mliswa usenqobe kukhetho lokudinga ozamela iNorton edale laphalamende.
UMliswa unqobe uMnu. Ronald Chinedza obencintisa kukhetho lolu emele ibandla le Zanu PF loMnu. David Choga obemele ibandla leNational Constitutional Assembly elikhokhelwa nguProfessor Lovemore Madhuku.
Ukhetho lolu lwenziwe kulandela ukuxotshwa kukaMnu. Christopher Mutsvangwa umgcinisihlalo wenhlanganiso yabalwa impi yenkululeko eye Zimbabwe National Liberation War Veterans Association, owetheswa icala lokuthethisa uMongameli Robert Mugabe lomkakhe, uGrace.
Imbiko ebulenjini beInteret ebikade ilandelwa yiVOA Studio 7 iveze ukuthi obemele ibandla leZanu PF udliwe loba nje kade ekhankaselwa kukhetho lolu ngabasekeli bakamongameli welizwe, uMnu. Emerson Mnangagwa loMnu. Phelekezela Mphoko okubikwa ukuthi basekela amaqembu atshiyeneyo afuna ukubangomaqhuzu kubandla leZanu PF.
UMnangagwa loNkosikazi Grace Mugabe kubikwa ukuthi bafuna ukungena esikhundleni sikaMugabe. Kusobala ukuthi basebenzisa amaqembu athi Team Lacoste lele Generation 40 ukwenzela ukuthi omunye wabo angene esikhundleni sikaMugabe oseluphele.
Sizalethulela okunengi ngodaba lolu ngeSonto. Thiyani indlebe lizizwele!!