amalinks wokungena

Kuthakazelelwa Iminyaka Elitshumi Yokusungulwa kweSexual Rights Center


Athabile okwamagama amalunga enhlanganiso yeSexual Rights Center.

Inhlanganiso yokulondolozwa kwamalungelo ezemacansini, eyeSexual Rights Center (SRC), ngoLwesithathu koBulawayo inanze iminyaka elitshumi yasungulwayo.

Yenze lokhu ngelanga le International Day Against Homophobia and Trans-phobia ngaphansi kwesihloko esithi ‘Celebrating Diverse Families and a Decade of Championing Sexual Rights’.

Amanye amalunga enhlanganiso yeSexual Rights Center.
Amanye amalunga enhlanganiso yeSexual Rights Center.

Bekungabizwa ozwayo ngesikhathi kuthakazelelwa lolusuku lwe SRC lapho abantu abasebenzelana labo kunhlangothi ezehlukeneyo bebethakazelela amalungelo abo emacansini.

UMqondisi weSRC, uMnunzana Humphrey Ndondo, uthe yebo bayajabula ukuthakazelela iminyaka elitshumi belwisana lokuqakathekiswa kwamalungelo abantu emacansini kodwa lokhe kulobunzima obuthile.

Bathakazelela ukubunjwa kwe Sexual Rights Center.
Bathakazelela ukubunjwa kwe Sexual Rights Center.

UMfundisi Loveness Khanye, obesemkhosini lo, uthe abantwana abazalwa belobulili obungacaciyo kumele basekelwe hatshi ukubathathwa njengabantu ababi ngoba abazidalanga kumbe abakhethanga ukuba yilokho abayikhokhona.

Umzali olomntwana olobulili obungacaciyo, uNkosikazi Patience Siwela, uthe njengomzali sewakwamukela lokhu njalo usefunde okunengi ukuba amkhulise kanjani umntanakhe.

Osakhulayo obengafihli ukuba yena ulobulili obungacaciyo, uTineyi Marozwa, uthe ngemva kokusebenzelana leSRC usewazi amalungelo akhe njalo akesabi ukukhuluma ngesimo sakhe.

Abanye abasemkhosini wenhlanganiso yeSexual Rights Center.
Abanye abasemkhosini wenhlanganiso yeSexual Rights Center.

UNkosikazi Memory Papa, okade esemkhosini lo, uthe yebo bananza iminyaka elitshumi, kodwa isisekelo sombuso lokhe singacaci okwenza bazizwe bebandlululwa.

Ophila ngokuthengisa ucansi, uNkosikazi Nonqaba Jamela, uthe sebesebenza kahle ngemva kokufundiswa ngamaqgwetha mayelana ngamalungelo abo.

EZimbabwe abantu abaphila ngokuthengisa ucansi bathwala nzima kubhizimusi labo ukudlula labo abathengayo kuthi abazalwa belobulili obungacaciyo labo bakhula nzima.

Facebook Forum

XS
SM
MD
LG