amalinks wokungena

Breaking News

Izakhamizi ZakoBulawayo Zilakho Ukungatshengiseli Ezitaladini Kusasa


Uzulu ukewatshengisela ngeviki ephelileyo eHarare ekhonona ngokuthi akulanguquko kwezokwenziwa kokhetho eZimbabwe.
Uzulu ukewatshengisela ngeviki ephelileyo eHarare ekhonona ngokuthi akulanguquko kwezokwenziwa kokhetho eZimbabwe.

Abantu abanengi kabakaqondisisi koBulawayo ukuba bazaphatheka ekutshengiseleni kwakusasa okokungayi emsebenzini abanye babo bekhonona ngesimo esibi somnotho welizwe lezombusazwe.

Abakhulume leStudio 7 bathe ukutshengisela lokhu, okukhankaselwa zinhlanganiso ezinjenge Tajamuka-Sesijikile Campaign lamabandla aphikisa uhulumende weZimbabwe, akulethi lutho njalo abantu bacina bebhulwa kabuhlungu ngamapholisa.

Bathi kababoni abantu besenza lokhu ngenxa yokuthi idolobho lakoBulawayo kukhanya ukuthi lavalwa ngomnyaka ka1980.

Abakukhangeleyo yikuthi idolobho leli livulwe njalo kuvuselelwe amafekithali uzulu athole umsebenzi.

Abamavinkili kanye labezimota ezithwala abantu bona bathi kusasa bazasebenza njengehlalayenza besithi abakubona kusenzakala eHarare labakubona kusenzakla eMakokoba abafuni kuphinde njalo.

Umkhokheli webandla leMthwakazi Republic Party, uMnunzana Mxolisi Moyo, ukhuthaze abantu ukuthi bangaphatheki ekutshengiseleni kwakusasa.

UMoyo uthe ukutshengisela kwakusasa akulethi nzunzo kuzulu ngakho abantu abaphatheke kulokho okubasizayo hatshi okukhulisa amagama abantu abathize.

Umkhokheli weZAPU, uMnu. Dumiso Dabengwa uthe abantu bayiphiwe imvumo yokutshengisela kodwa kumele abantu baqakathekisa ukusebenza kwesisekelo sombuso esitsha esilakho ukuqondisa okunengi okonakalayo elizweni.

Udaba Esilethulelwe NguNompumelelo Moyo
please wait

No media source currently available

0:00 0:04:09 0:00
Lapho esitholakala khona

UDabengwa usole njalo umanyano weNational Election Reform Agenda oyiwo oqoqa lokhu kutshengisela esithi kaboni besenelisa ngenxa yokutha bavele behluleke ukuletha inguquko kwezokhetho ngesikhathi bekuhulumende womanyano weGovernment of National Unity.

Amapholisa ahlome aphelela lalawo aziqgokele impahla zabo sebezulazula njengokhozi koBulawayo, okukhombisa ukuba kusasa isimo siyabe sisibi lobanje inengi labantu lisithi uBulawayo kavalwa.

Ukuhlukuluzwa kwabantu bebhaxabulwa ngamapholisa, abanye bebotshwa kulakho ukumemethekisa ukuhlala abantu betshengisela kumbe besesaba ukutshengisela koBulawayo kulandela isiga seMakokoba leBurumbo kunyanga ezimbili ezedluleyo okwacina eyinye imuli ilahlekelwa yingane ngemva kokuphoselwa intuthu ehitshayo eyeteargas endlini.

XS
SM
MD
LG