amalinks wokungena

Kubunjwa Inhlanganiso eSouth Africa Yokukhankasela Ukuvota eZimbabwe

  • Bennedict Nhlapho

Uzulu obevota eZimbabwe ngomnyaka ka2013.

Uzulu obevota eZimbabwe ngomnyaka ka2013.

Inhlanganiso zikazulu, ezombusazwe, ezamabandla ezokholo lezamasiko zabeZimbabwe abahlala kweleSouth Africa, sezibumbe umanyano eziwubiza Zimbabwe Diaspora Vote Coalition.

Lezi inhlanganiso zithi inhloso yalo umanyano yikulwela ilungelo lokuthi zonke izizalwane zeZimbabwe zivunyelwe ukuvota ziseSouth Africa ekhethweni luka 2018.

Abenhlanganiso lezi bathi bafuna ukuphiwa ilungelo lokuvota kungakho becabange ukumanyana kuloludaba. okhokhela inhlelo zalo umanyano uMnu. Thulani Ndebele, uthi kudala uhulumende weZimbabwe esephula ilungelo labo lokuvota besemazweni ngakho sekuyisikhathi sokuthi balithole lelo lungelo.

“Sivumelene ukuthi sonke sifuna lelo lungelo singakhangelanga ukuthi thina siphumaphi may be siyi Zim First, or siyiZanu PF or siyi MDC whatever, sonke sifuna ilungelo lokuthi sikhone ukuvota lana by the virtue of bring Zimbabweans, I think its within our right ukuthi sikhone ukuvota lana.”

Inengi lezizalwane zeZimbabwe ezikweleSouth Africa ngabantu abasuke elizweni bebalekela esimo esibi kwezomnotho lezombusazwe. Bonkeke bathwele nzima njengoba belezimuli abaziselelayo ezasala eZimbabwe, kanti nxa sekuyisikhathi sokuvota abanengi abayi ekhaya njengoba bayabe besebenza.

Umgcinisihlalo weMDC ekhokhelwa nguMnu. Welshman Ncube kweleSouth Africa uMnu. Leonard Dube uthi nxa bengalithola lelo lungelo bazanxusa wonke umuntu weZimbabwe oseSouth Africa ukuthi ayevota.

“Sizogqugquzela abantu ngempela ukuthi nayi imvumo yokuvota. Hayi idiaspora vote siyitholile. Abaze ngobunengi bazovota. Nakhona futhi sizokwenza ukuthi sazi futhi ukuthi bazoregistwa kanjani baregistwa kuphi, bazanani into ezifuneka ukuthi baregistele ukuvota.”

Abanye kulo umanyano bathi sebekubonile ukuthi obekusenza behluleke enhlelweni ezinengi yikwehluleka ukumanyana ngitsho lasezintweni abayabe bezifuna ngokufanayo.

Bakhonake abanye abathi malutshwana amathuba okuthi uhulumende weZanu PF asivume lezo sicelo. Kodwa umkhokheli webandla le Liberal Democrats uMnu. Vusumuzi Sibanda, uthi okwakhathesi leli lilungelo abazimisele ukulilwela baze balithole.

“Ngicabanga ukuthi ngeke baze bakulalele kodwa, into ekhonanje yikuthi umthetho useceleni kwethu, not umthetho kuphela oweZimbabwe kodwa umthetho weAU. umthetho oweUnited Nations u article 25 lo article 13 owe AU ukhuluma ngokuthi abantu balelungelo lokuvota, so akuyona indaba yokuthi ubani uyathanda kumbe akathandi. yintonje okufanele yenzeke ngoba umthetho uthi makwenzeke.”

Kucatshangelwa ukuthi izizalwane zeZimbabwe ezihlala kweleSouth Africa ziyedlula izigidi ezimbili, kanti abakulo umanyano bathi inengi labo balindele ngamehlo abomvu ithuba lokuvota besemazweni.

XS
SM
MD
LG