Umphathintambo obona ngezokwethekelelwa kwelizwe, uMnu. Walter Mzembi, unqotshiwe kukhetho lokudinga unobhala jikelele wenhlanganiso yeUnited Nations World Tourism Organization.
UMnu Mzembi ubencintisa emele amazwe wonke asezwekazi leAfrica kukhetho oluqhutshelwe eMadrid kweleSpain ngoLwesihlanu.
UMzembi uqale ekhokhela kulolukhetho ngemva kokuthola amavoti alitshumi lanye elandelwa yisizalwane saseGeorgia, uMnu. Zurab Polilakashvilli, yena obelamaviti ayisitshiyagalombili.
Kodwa kusuke kwenziwa ukhetho lwesibili, irunoff, ngoba engekho phakathi kwababili laba obethole isilinganiso samavoti adingakalayo.
Kulapho ke uMzembi asuke wanqotshwa khona nguPolilakashvilli yena othole amavoti alitshumi lasitshiyagalombili kwathi uMzembi wathola alitshumi lanhlanu.
Lolu lukhetho obelukhangelelwe kakhulu nguhulumende weZimbabwe.
Ummeli weBinga North edale lephalamende, uMnu. Prince Dubeko Sibanda, utshele iStudio 7 ukuthi kusobala ukuthi uMnu. Mzembi unqotshiswe ngezombusazwe zeZimbabwe ezingamanga kuhle.
