KuWoza Friday siliqhunsele eze rumba ezivela kuqembu elitsha ele Phelandaba Super Sounds. Abasunguli balo uMsunduzwa loMakhwapheni basungule leliqembu ngedlalade elithi UMangwenya.
Ibizo lakhe lokuzalwa uMsunguzwa nguNqobani Ndlovu kuthi-ke uMakhwapheni elakhe nguDescent Sibanda.
Iqembu lalez’insizwa ezidabuka ePhelandaba eTsholotsho libunjwe nyakenye kodwa uMsunduzwa uthi selivutha bhe.
“I-album yethu le entsha esiyikhiphileyo ngendlela ehamba ngakhona, hayi besibona ihamba kahle besicela kakhulu labalandeli bethu befake kakhulu izandla. Igama lesihloko lithi uMangwenya. Lana sikhuluma ngomfazi. Loba ngubani olomfazi wakhe owahambayo engakwazi ukumtshayela yona. Akusikho ukuthi mhlawumbe ukhona uMangwenya esicula ngaye owahambayo.”
Zonake kukhanya ziphiwe lezi insizwa ekuqumbaqumbeni iziginci lemlonyeni.
UMakhwapheni yena okunguye okhalelayo, kuthi uMsunduzwa abesengungwini uthi bayazincoma ngomsebenzi abawenze kuleli dlalade.
“Mina igama lami nginguDescent Sibanda, ngidume ngelithi Makhwapheni ebhendini. Yimi engi lidayo kuPhelandaba Super Sounds. Yimi engifaka amavoice. Hayi ma ngizimamele kahle ngizwa ukuthi hayi lento ngayenza ngenhliziyo yami yonke. Akukho lapho engizisola khona ngiyajabulanje lami uma ngizizwanje i voice yami ma iphuma kanje emsakazweni kanje.”
Ngeyakuqalake i-album yaleli qembu elibunjwe nyakenye. Bobabili laba baculi bake bacula phambilini beyi Quality Super Sounds. Kanti bathi zonke zoyisikhombisa ezikuleli idlalade zikhuluma ngezigigaba zempilo.
UMsunduzwa uthi bazimisele ukusakaza umculo wabolwe umhlaba wonke.
“Sifuna ukuthi umculo wethu uzwakale yonke indawo ... Even nabantu bakithi abaseZimbabwe, abaseUK, nabo Botswana kuphi kuphi kodwa bebenazo ingoma zethu bazidlale khonale zibakhumbuze ekhaya. Ma kungabe mhlawumbe ngabe lelizwe lakithi yileli elifana namanye amazwe zingene lakuzi Studio zonalezi ezinkulu.”
Ngakwelinye icele uMakhwapheni uthi wonke olalela ingoma zabo utsha endlebeni kufudumale enyaweni.
“Sakhetha ukuthi kube nama message azwakalayo kucace yonke intonje kube segcekeni ukuthi umuntu engathwalinzima ezama ukumamelisisa ukuhi laphana kuthiwani. Lespeed sathi ukusibeka phansi sisehlise, singafani lamanye amaband. Kodwa ziyajaviyiveka ingoma zethu. So besicela ukuthi nabo bafake izandla kakhulu ukuze sikwazi ukuqhubekela nathi senze lokho okuhle esikwenzayo manje.”
Lezi insizwa ezihlala eThembisa okwamanje zithi loba kungabonakala sengathi kusasekude ukuthi bebengosaziwayo kwezeRhumba,ukubekezela kuzala inkozi.
