amalinks wokungena

ZPP: Uzulu weChimanimani Uthwele Nzima Ngokwethuselwa yiZanu PF

  • Ntungamili Nkomo

Inhlanganiso yeZimbabwe Peace Project (ZPP) ithi uzulu weChimanimani West sedlela evalweni ngokwethuselwa ngabasekeli beZanu PF ngaphambilini kokhetho lokudinga ummeli walesi sigaba edale lephalamende ngoMgqibelo.

Inhlanganiso le ithi njalo ibandla leZanu PF lithenga amavoti ngokudla okuncitshwa abasekeli bamabandla aphikisayo.

Amasotsha kanye lamapholisa lawo abikwa esegcwele kulesisigaba, okuyinto ebikwa isethusa izakhamizi, kutsho iZPP.

Abazancintisa kukhetho lweby-election lolu babalisa uNokuthula Matsikenyere oweZanu PF, uPesanai Musakaruka owebandla leNCA, uPeter Gugyanga owebandla leRenewal Democrats of Zimbabwe kanye loMnu Edmore Mtetwa olilunga elizimeleyo.

Isigaba seChimanimani West sisele singela mmeli edale lephalamende ngemva kokuxotshwa kukaMnu Munacho Mutezo kubandla leZanu PF esetheswa icala lokusekela uNkosikazi Joyce Mujuru.

IZPP ithi ukwethuselwa kwabantu ngamalunga eZanu PF kukhanya kudlondlobala ngaphambilini kokhetho olukhangelelwe ngabantu abanengi ngomnyaka ka2018.

“Okusikhathaze kakhulu esikuzwa kuphuma eChimanimani West yikuthi bantu bayatshelwa ukuthi abayavota ngabantu beZanu PF kuphela,” kutsho umqondisi weZPP uNkosazana Jestina Mukoko.

XS
SM
MD
LG