Inani lenhlanganiso ezathenjiswa ukuba zingaphumelela ukusungula imisakazo selehlile livela kutshumi lathoba minwe mibili laya kusithupha kulandela imbiko ethi imali efunwa luhlangothi lwe Broadcasting Services Authority enengi okokuthi ezinye inhlanganiso kaziyenelisi.
Abafuna ukusungula imisakazo babikwa kumele bakhokhe inkulungwane ezimbili lengxenye zamadola-$2 500 kwasekuthi ezathenjiswa ukuthi zingathola ilayisensi zahlawuliswa inkulungwane eziyisikhombisa lamakhulu amahlanu zamadollar-$7 500.
Labo abazathola amalayisensi bazamele bahlawule njalo inkulungwane ezingamatshumi amahlanu zamadollar-$50 000. Asebehlulekile ngabenhlanganiso ezibalisa iLupane Radio, Bukisa Services le Mosie Radio eye Victoria Falls iMasego Multi-Media eyako Bulawayo, iVox Media Productions eye Harare le AB Communications eyedolobho le Mutare.
Abahlabeleli abanengi bathi bebekhangelele ukuthi limisakazo iqale ukusakaza ukuze babe lethuba lokuthi ingoma zabo zitshaywe emoyeni.
Sixoxe lomunye wabo, u Khulekani Betule, owazakala ngelokuthi Khuxman ukuze sizwe imbono yakhe ngaloludaba.
