Abalimi bakulumango sebehlalele evalweni besesabela ukulahlekelwa yizilimo zabo kulandela ukutshisa osokube khona abezomkhathi besithi kuzaqhubeka emangweni weMatabeleland South, eMasvingo lakwezinye indawo zeManicaland le Midlands.
Indawo ezinengi ezigabeni zeMaNdebeleni kanye leMasvingo azikani izulu elizwayo selokhu kwaqala umnyaka. Izilimo ezinengi sezibuna ikakhulu umumbu obusutshakaza okuyikho udinga amanzi amanengi.
Ababona ezomkhathi, iMeteorological Department, bathi kukhangelelwe ukuthi izulu line endaweni ezinengi zelizwe kuyonale iviki ngaphandle kwezigaba zeMatabeleleland South leMasvingo lapho ilanga liyaqhubeka likhipha inhlanzi emanzini.
Bayaqhubeka bethi eminyakeni eminengi bavame ukunisa amayezi ezulu i-cloud seeding ngalesisikhathi kodwa lonyaka ayikho imali yokwenza lumsebenzi.
UNkosikazi Bongiwe Mlalazi, olime emangweni weInsiza eMatabeleland South, uthi izilimo ezinengi sezidanile emasimini ngokusilela kwezulu. Uthi lanxa kuyake kutshise lamayezi athwale, konke lokhu kusuka kuphelele emoyeni kungela zulu elinileyo.
Wengeze esithi bakhangelele ukuthi izulu line kumalanga wonala azayo ngoba lingenzanga njalo izilimo ezinengi ziyabe zingaseyikukhahlela ngendlela.
Umlimisi we Insiza, uMnumzana Hebron Ncube, uthi bahlezi bekhuthaza abalimi kulumhlubulo welizwe ukuthi basebenzise indlela ezintsha zokulima ezilondoloza amanzi njengoba izulu lisilela minyaka yonke. Uthi sebefundise abanye abalimi ngendlela lezi ezintsha zokulima eze-conservation farming osokuleminyaka emibili bezifundisa, ukuze izakhamizi zibone umahluko obakhona nxa kulondolozwa amanzi.
UNcube uthi baphatheke kumsebenzi wokufundisa abalimi lindlela entsha yokulima bekhangelele ukuthi kube yiyo ecina isetshenziswa kundawo zonke ezisilela izulu ukuze kuqedwe udaba lwendlala. Uthi kuqakathekile ukuthi umhlabathi lawo ulondolozwe ngoba nxa uvele ulinywa minyaka yonke uya uphela ukudla okuyikho okudingwa yizilimo.
Ingcitshi kwezokulima zithi izilimo zilakho ukuqeda amaviki amathathu zingatholanga amanzi lapho zisesezincane kodwa lapho sezitshakaza ziyabe sezidinga amanzi amanengi. Uhlangothi lwe Meteorological Department lwabelwa inkulungwane ezingamakhulu amane amadola - $400 000 ukuphatha inhlelo zalonyaka kodwa imbiko ithi ugatsha lwezemali alukayikhuphi limali.