Amabhizimusi alungisa izicathulo akwele South Africa athathele phezulu ithuba lokuthengisa izicathulo zeskhumba ngokubukisa imisebenzi yabo embukisweni wamalanga amabili eZimbabwe okulabantu abakhala ngokuthi sebekhathele ngokuthengiselwa izicathulo zama plastic ezivela emazweni awempumalanga agoqela eleChina.
Amabhizimusi edlula alitshumi lanhlanu atshengise imisebenzi yawo embukisweni wamalanga amabili ophele ngoLwesibili eHarare wempahla ezilungiswa ngeskhumba ebalisa izicathulo, izikwama lamabhanti.
Umnumzana Goodman Kausiyo wenkampani ye Leather and Footwear Manufacturers uthi babone isikhathi sifanele njalo lilikhulu ithuba elitholakala kuleli.
Uthi leli libe lithuba elihle lokuba izizalwane zakuleli zibone izicathulo lemphahla yezikhumba ezwayo ethi abantu abanengi kuleli bathola izicathulo ezitshipileyo kodwa asebebona ukuba bacina belahlekelwa yimali enengi ngoba zingahlali okwesikhathi eside.
Unkosazana Pearl Thusi ongumqondisi wenkampani ye Pearl of El elungisa izikwama zabesilisa lezabesifazane okugoqela izikhwama zama laptop ama clutch bag lama sling bags ezenzela uthi ele Zimbabwe lilethuba elihle lomkhambo wezinto ezinzileyo ekhuthaza izizalwane zakuleli ikakhulu abesifazane abasakhulayo ukuba bazifundise imisebenzi enjengaiyenzayo ukuba bezithuthukise:
Ele Zimbabwe libhekana lobunzima kudaba lokusebenza kwama industry alo okubangele ukuba inengi lawo licine livalwa njalo sokube lokwengezelela okumangalisayo kwezicathulo lemphahla ethengiswa ivela emazweni asempumalanga okugoqela eChina esithathelwa phezulu nguzulu obhekana lenkinga zokusilela kwemali.
Uzulu uhlala ekhala ngemphahla engelahlonzi abathi noma ithengwa ngentengo ephansi itshabalala ngemva kwesikhathi esingatsho lutho.
Abalungisa izicathulo eZimbabwe bathi babhekana lobunzima bokuthenga izikhumba eziyabe sezilungisisiwe kuleli okucina kubabamba ngamandla ukuthenga kwele South Africa okwenza ukuba izicathulo zabo zithengiswe ngentengo ephezulu.