Izizalwane zeZimbabwe ezehluleke ukuya kudla iKhisimusi lezihlobo labangane ekhaya, ngenxa yemisebenzi, zithi zifisela abasekhaya iKhisimusi elitshukela. Loba kunjalo bathi labo ngelanga leKhisimusi, bazadla izisu zigcwale phamu babubhudle buze buvume abanathayo.
Sezithengiwe ezifela emlonyeni, onamunede abanathwayo labo sebekhona kantike sekusaziwa lequde, imbuzi loba inkabi ezadliwa ngeKhisimusi.
Minyaka yonke izizalwane zeZimbabwe ezisebenza kwele South Africa zilibheke ngamehlo abomvu ilanga lekhisimusi njengoba kuyiso isikhathi abathola khona ithuba lokubuyela ekhaya besiyahlangana lezihlobo labangane kujatshulwa.
Ngokusweleka kwenhlanhla bakhona abathi inhliziyo zibomvu ngale ikhisimusi njengoba behlulekile ukuya ekhaya ngenxa yemisebenzi.
Lobanje kunjalo abeZimbabwe laba bathi amazinyo aseloliwe sebelindenje ukuthi kuse elangolweSine izisu zigcwale phamu.
Isizalwane seZimbabwe umnumnzana Nkosinathi Mhlanga, ngomunye wezizalwane zeZimbabwe ezizadlalalela ikhisimusi lapha eGoli. Uthike amafiriji avele asesisitheka ngohlobo lonke lukagazana kugoqela lezangaphakathi.
Lapha eGolike uthi bazabe besidla inyama njengenyama, bebubhudla santando kanti ngasemculweni kuzabe kuqhunswa ezigijimisa igazi.
Kakusuye yedwa uNkosinathi othi uzayidlalela eGoli eyalonyaka. Ijaha elisakhulayo uMessiah Dube uthi njengoba inengi selihambile ekhaya sekusele bona bodwa eHilbrow, zizabe zimbiwe ngulinda ngekhisimusi yalonyaka.
Kodwake akakufihli ukuthi inhliziyo ibuhlungu njengoba ubefisa laye ukuyayidla lemuli lezihlobo eZimbabwe kodwa wehlulwa yikuthi uzabe asebenza. Uthike kwabasekhaya liyidle lingayixoleli ngoba laye ngapha uzayithwalisa amagabha avuzayo.
Umnumnzana Mbekezeli Ncube odabuka eRatanyane eKezi, njalo engumculi kuqembu lomdumo kaMaskandi eleZemagic, uthabe umanzi te ngoba esithi besekwehlule ukuthi ayekhaya kodwa useze wakhuluwa emsebenzini. Uthi kule ikhisimusi kabalungisanga ukudla komlomo kuphela kodwa umpefumulo lenyawo lakho bakubekele uluju lomculo.
Yena uthi leqembu lakhe bazabe bekoNtuthuziyathunqa begcwele indawana yonke besipha uzulu idlalade labo elitsha bengakadluleli eTsholotsho.
Umnumnzana Ncube uthi ubuthongo bazabucina ngolweSibili bazebayebonana labo ngeSabatha ntambaba sebetshayisa egigini lezeMagic elizabe liseMguzana eTsholotsho ngolweSihlanu.