Abasakhulayo abaphatheke kuhlelo lweMandela Washington Fellowship for Young African Leaders ngomnyaka odluleyo abavela emazweni asezansi yeAfrica bathe gwaqa eJohannesburg kweleSouth Africa lapho abanikana khona imbono ngenhlelo zokuthuthukisa ontanga abazenzayo emazweni abo.
Abasakhulayo laba baqale ukuhlangana ngeSonto bekhulumisana ikakhulu ngamathuba akhona kwezamabhizimusi eAfrica, ezethuntuko, ezemfundo kanye lodaba lokungena lokuphuma kwabantu emazweni atshiyeneyo i-immigration.
Basole kakhulu ukuhlaselwa kwabavela kwamanye amazwe kweleSouth Africa (xenobhobia) okuqhamuke ngenyanga edluleyo kwafa abantu abayisikhombisa.
Abakhulume kulumhlangano, wona ophela ngoLwesibili, bagoqela ummeli weMelika eSouth Africa lomkaMongameli weleNamibia uNkosikazi Monica Geingos.
Besuka emahlanganweni lo abasakhulayo laba bazakuya emazweni atshiyeneyo ukuyasebenza lenhlanganiso ezenza imisebenzi ehambelana laleyo abayenzayo emazweni abo.
Sixhume omunye wabo uMnu Emmanuel Ndlovu osebenzela inhlanganiso yeBulawayo Progressive Residents Association njalo ozakuyasebenza lenhlanganiso yeMercy Corps eAbuja kwelenigeria okwenyanga ezintathu kuqala ngoLwesithathu.
Kunjalo nje abasakhulayo abazaphatheka kuhlelo lunye lonyaka sebekhethiwe njalo abavela eZimbabwe bangamatshumi amathathu. Bakhangelelwe ukubuya eMelika ngenyanga ezayo.