Ingcwethi kwezempilakahle zixwayisa inkokheli zokholo lwesi Khristu ukuba zehlukane lomkhuba oyingozi wokwenza abaphila legciwane baphethe bengasawanathi amaphilisi ama ARV’s ngoba kuthiwa kalisekho igciwane emizimbeni yabo ngemva kokuthandazelwa ngoba lingasabonakali egazini, selicatshe kwezinyo izitho zomzimba okufana lembilaphini kanye lenqondo.
Lokhu ngokunye kokuvezwe ngumqondisi wohlangothi olubona ngendaba ze gciwane, umkhuhlane wengculaza kanye lowofuba, uDr Owen Mugurungi emhlanganweni lentathelizindaba, wokufundisana ngolwazi phezu kwesimo segciwane elizweni, owenzelwe emahofisini amaqhwetha alwela ilungelo loluntu awe Zimbabwe Lawyers for Human Rights.
UDr Mugurungi uthi akumelanga inkokheli lezi kwezokholo ziqhubekele phambili sibangela ukungathathi amaphilisi kwamalunga azo ngoba kuthiwa seliphelile emizimbeni yazo. Ukhuthaza abezokholo laba u Dr Mugurungi,ukuba lezi nkokheli kumele ziqhube umsebenzi wokutholisa uzulu okumphathisa ukulondoloza impilo yakhe ngendlela etshiwo ngumbhalo,bavumele abezempilakahle baphathe umsebenzi wabo wokwelapha abadinga lolo sizo bathathe imithi yabo okufana leyama ARV okumele bayinathe impilo yabo yonke endaweni yokubatshelela eceleni kuthiwa bayekele.
Lokhu kusekelwe ngumnumzana Amon Mpofu okhokhela uhlangothi lwenhlolisiso enhlanganisweni ye Zimbabwe National Aids Council.
Kuqakathekile ukuba lezi nkokheli zikhuthaze abalandeli bezinkonzo ukulandela imikhuba encedisa ekuthini baqhelise isikhathi sabo sokuphila lanxa belalo lelogciwane hatshi ukutshumayela ngendlela ephambuka embhalweni, okucina kubangela ukulahlekelwa kwempilo zabo.
Uhulumende uhlezi ekhala ngalezi nkokheli zokholo ngalesi senzo bebakhuza labo abazithi ngama profitha ukuba behlukane lomkhuba wokuqambela uzulu amanga bethi seliphelile igciwane ngemva kokuthandazelwa.
Ingcwethi zithi kumelee uzulu azi ukuba kawukatholakali umuthi ongelapha ingculaza ngakho labo abaphila ngamaphilisi kumele baqhubekele phambili bewanatha hatshi ukuvuma ukutshelwa ukuba bewayekele ngoba kuyingozi enkulu njengoba bekhona asebelahlekelwe yimiphefumulo ngaleso senzo.