Ihloka lilengela abaqeqetshi abambalwa ngemva kweviki yetshumi lesikhombisa eyemidlalo ye Castle Premier Soccer League.
Umqeqetshi weqembu le FC Platinum uLloyd Mutasa kanye lomqeqetshi weqembu le Chicken Inn uJoey Antipas yibo abasengozini yokulahlekelwa yimisebenzi ngemva kokuba amaqembu abo ehlezi endaweni ezingathokozisi inkokheli zawo.
UMutasa ubikwa esile ngelihlo lenalithi ensukwini ezedluleyo njengoba inkokheli zeqembu bezisithi akatshengiswe indlela kodwa uMongameli weqembu uGeorge Mawere wabhula umlilo.
Inkinga manje lalabalandeli beqembu sebemhlamukele uMutasa njalo batshengisele ngemva komdlalo weqembu lePlatinum lele Chapungu ngoMgqibelo wona ophele zingutshiki lobhanqa 0-0 bethi akasuswe esikhundleni.
Iqembu le FC Platinum liyachaya ibhola kodwa kaliyenelisi ukuhlohla osekudale ukuba libe ngutshiki lobhanqa emidlalweni eyithoba munwe munye njalo lihlezi kundawo yesithupha lilemiklomelo engamatshumi amabili lane.
UAntipas yena ubikwa eyetheswe umthwalo owokuba kumele anqobe emidlalweni ethile egoqela odlalwe liqembu lakhe lele CAPS United ngeNsonto wona ophele iChicken Inn inqotshwe nge 1 ka nya.
Lokhu ngemva kokuba iqembu le Chicken Inn lingaqhubi kuhle lonyaka ikanti inkokheli yalo iqhatshe uAntipas nyakenye ilenjongo yokuba leliqembu libe ngelinye elilwisa ukuphakamisa isicoco.
IChicken Inn ihlezi kundawo yetshumi ilemiklomelo engamatshumi amabili.
Phezu kwengalane isimo kasiguqukanga njengoba iqembu le Highlanders lilokhu likhokhela ele Dynamos lele ZPC Kariba ngomklomelo owodwa ngemva kokuba womathathu lawa maqembu ebe ngutshiki lobhanqa emidlalweni yawo.
IHighlanders ilemiklomelo engamatshumi amathathu lambili kuthi I Dynamos le ZPC Kariba zilemiklomelo engamatshumi amathathu lanye.
…………………………………………………………………………………………………………………………………………………………………………………………………………………….
Imidlalo ye Africa Union Sports Council Region Five Under – 20 Youth Games ezaqhutshelwa edolobheni lako Bulawayo ekupheleni komnyaka yethulwe kumphakathi ngokusemthethweni ngoMgqibelo ntambama kontuthu ziyathunqa.
Lumkhosi ubukhangelelwe ukuba uvulwe ngokusemthethweni ngumsekeli kaMongameli welizwe uJoyce Mujuru yena ongasabuyanga wasebanjelwa ngumphathintambo omkhulu elizweni uSimon Khaya Moyo.
Ekhuluma kulumkhosi umphathintambo wezemidlalo lamasiko uAndrew Langa uthe amalungiselelo okuqoqa limidlalo ahamba kuhle njalo bakhangelele ukuba zonke indawo okuzaqhutshelwa khona imidlalo zibe sezilungile ekupheleni kwenyanga ezayo.
Amazwe akhangelelwe ukuphatheka kulimidlalo agoqelae eleSouth Africa, Zambia, Namibia, Malawi, Lesotho, Botswana, Mozambique, Angola, Swaziland, Seychelles, Mauritius, Tanzania, Democratic Republic of Congo kanye le Madagascar.
…………………………………………………………………………………………………………………………………………………………………………………………………………………………………………………………………………………………………………………………
Sikhangele umdlalo we rugby;
Imizamo yeqembu elimela ilizwe kuhlobo lomdlalo we rugby edlalwa ngabadlali abalitshumi lanhlanu eyokuyadlala kumidlalo yezizwe zomhlaba iphelele emoyeni njengezithukuthuku zenja ngemva kokuba linqotshwe nge 23 ka 15 ngele Russia ngoMgqibelo emdlaweni odlalelwe khonale elizweni leRussia.
Limpumela itsho ukuba iqembu leZimbabwe kaliselalo ilungelo lokuqhubekela phambili ngomkhankaso wokuzama ukuba ngelinye lamaqembu azancintisa eNgilandi ngomnyaka ozayo.