Ngemva komnyaka ogcweleyo betshiye izihlobo labangane babo ekhaya, inengi lezizalwane zeZimbabwe ezisebenza Kwele South Africa sezilubhekise ekhaya kukhefu leKhisimusi. Lobanje inhliziyo ziphuphuma ngentokozo njengoba kuzadliwa ezifela emlonyeni kuxoxwe lendaba zomnyaka wonke, inengi lithi likhathazekile ngenhlupho ezinengi abahlangana lazo besiya ekhaya lanxa sebephenduka kwele South Africa.
Bekusetshenzwa gadalala umnyaka wonke abanye ubusuku lemini kukanti abanye besetshenziswa okwezichaka. Njengobake umnyaka usuphelile, kunengi labeZimbabwe abasebenza kwele South Africa sekuyisikhathi sokuyakudla iKhisimusi lezihlobo labangane ekhaya.
Njengoba abanengi sebevalile emisebenzini kuyaphithizela emarenkini lemitshoveni lowo lalowo efuna ukuba ngowakuqala ukuthola indawo. Ngenxa yobunengi babantu uhlupho oseluhlangana labahambayo laba ngolokudula kwamabhasi osekusithi uthole abanye sebebhadala amaRandi ayinkulungwane (R1000) ukuze umuntu athole indawo ebhasini.
Umnumnzana Mbekezeli Sibanda ngomunye wabasendleleni yokuya ekhaya kantike yena ulubhekise kibo ePlumtree. Uthi njengoba esevalilenje uselubhekise ekhaya kodwa kahlalisekanga enhliziyweni nxa ecabanga isiphithiphithi esikhona emngceleni we Beitbridge.
Njengoba inengi labahambayo selivalile umsebenzi, sekuvele sekulendwendwe ezinde kulo umngcele njengoba wonke umuntu egijimela ukuyakudla ikhisimusi lezihlobo labangane eZimbabwe.
Umnumnzana Sibanda ulesixwayiso esikhulu kulabo abazafika ekhaya bakhohlwe ukuyathatha amaphasipoti umuntu ethembe ukuthi uzafohla ecingweni nxa esephenduka ngoZibandlela.
Unkosazana Sihle Ndlovu odabuka eGwanda laye uthi uselubhekise ekhaya kodwa umoya wakhe uzakhululeka kuphela nxa esechaphe umngcele. Njengomuntu ohamba ngemota yakhe ingcwele phamu izibiliboco uthi wesabela ukuthi angathathelwa ezinye imphahla kantike lamapholisa eZimbabwe abamelele endleni efuna imali yesifumbathiso.
Umnumnzana Ndaba Sibanda laye uthi ulubhakise kubo eGwanda. Uthi ngemva komnyaka engabonani lezihlobo zakhe, sekumphuzele ukufika ekhaya. Uthi akathandabuzi ukuthi ukuhlangana kwakhe lezihlobo kuzabalithuba elihle njengoba ebathengene zonke ezimnandi kanye lempahla zokugqoka. Kodwake UNdaba akakhohlwa ukuxwayisa labo abalubhekise ekhaya ngohambo lokuphenduka kwele South Africa sebebuyela emsebenzini.
Kusenjalo uhulumende we South Africa uthi sekwenziwe amalungiseleleo okuthi abazasebenzisa umngcele we Beitbridge bangabanjelelwa ekuphumeni kwabo. Ugatsha lwendaba zasekhaya kwele South Africa luthi selwengezelele izisebenzi kulo umngcele ukwenzela ukuthi izihambi zingachithi amahola amanengi zimelele ukudindelwa amaphasipoti.