amalinks wokungena

Breaking News

Abasakhulayo Bathi Kababoni Ukuqhakatheka kweAfrica Day


Africa Union
Africa Union

Ngesikhathi sikhangelane losuku lokunanza ukubunjwa komanyano wezwekazi le Africa oweAfrican Union mhlaka 25 Nkwenkwezi, abasakhulayo kunye lencitshi zeZimbabwe zithi alikhanyi ithuba lokuba kungaba lomanyano wala amazwe ongavulela izigidi lezigidi zezizalwane zalo amasango entuthuko lempilakahle engahambelana letholakala endaweni ezifana le Europe, America, Australia lamanye amazwe athuthukileyo.

Amazwe awezwekazi le Africa akhangelele ukunanza ilanga lomanyano walo ngoMvulo okwenziwa minyaka yonke kuleli zwekazi mhlaka 25 Nkwenkwezi.

Abatsha bathi ababoni bezafika kubanga lapho umanyano we Africa ungabaphathisa ekuthuthukiseni impilakahle yabo ngendlela izinto ezihamba ngayo.

Unobhala jikelele wenhlanganiso yezifundi eye Student Representative Council uSitshengisani Vuma uthi isifiso yiyo into ekhanya ingekhoyo emazweni awe Africa sokuba lelizwekazi lisebenzelane ngomanyano ongaphanga uphathise uzulu wonke kilo.

Unkosazana Chantel Mkandla oquba izifundo zezombusazwe iPolitical Science uthi umbuthano we African union wona ngokwawo obuthanisa amazwe anje ukhanya udonsa amadolo ukusebenzela ndawonye ngokuseqinisweni okucina kubangela ukuxabana kwabantu:

Uthi kulezinto eziqakathekileyo ezilokhe zimele zenziwe hatshi elizweni linye ngalinye kuphela kodwa eAfrica yonke jikelele ngokufanayo ukuze abantu kugoqela abantwana labesifazane baphile ngcono bevikelwa amalungelo abo:

U Romeo Musemburi oyingcwethi kwezomnotho uthi ukusebenzelana kwamazwe emanyene ikakhulu njengelizwe linye kungaphathisa akuba inthuthuko yelizwe elinje kwezomnotho iphange kuphathisa abantu abanengi ababhekana lendlala lobuyanga.

Kodwa umnumzana Kennedy Manduna ofundisa ezombusazwe e University ye Zimbabwe uthi okwamanje ukumanyana kwezwekazi le Africa ukuba libe lomongameli oyedwa lamazwe atshiyeneyo asenza njengezabelo okwakukhuthazwa ngumuyi owayengumongameli weLibya uCol Muamour Gadafi liphupho nje elikhatshana lokufezwa ngoba inkokheli ezinengi zingelaso isifiso njalo kulokungethembani phakathi kwenkokheli zalo lembono etshiyeneyo.

Osakhulayo u Lionel Majoni uthi noma kuqakathekile ukumanyanisa lelizwekazi kanje kumele kunanzelelwe ukuba lokhu kungaphazamisa amasiko lemikhuba yabantu bala mazwe.

U Hlengiwe Mthethwa ofundisa ezombusazwe uthi inkinga yikuba amazwe amanengi lokhe ebhekana lenkinga ezitshiyeneyo ezifana lobuyanga, abahlamuki abafana le Boko Haram le Al-Shabab kunye lokulwisana kwezombusazwe okokuthi isikhathi kunye lemali yokuba amazwe onke la amanyaniswe kuba ludubo njalo kuzakhethwa ubani ukuba elibuse leli zwekazi khona inkokheli ezinje zilwela ukubusa kanje lasemazweni azo

Izwekazi le Africa yilo elilobuyanga obedlulisa amalaulo kuzigidi lezigidi zabantu balo njalo imizamo yokusebenzelana isibone ukubunjwa kwe African Union, I Pan African Parliament lenhlanganiso ezifana le Ecowas, Sadc, Arab Magreb le Comesa.

XS
SM
MD
LG