Abaphila ngokuthengisa ezitaladeni eHarare baveze ukuthukuthela okukhulu ngemizamo kamphathintambo wombuso yamadolobha lezabelo yokuba besuswe endaweni abathengisela kizo ngesikhathi uzulu ebhekana lobunzima kundlela yokuziphilisa ngayo elizweni elile simo somntho esigaqe ngamadolo kungela misebenzi.
Inhlanganiso ezimela abasebenza bezimele zibambe umhlangano lo mayor wedolobha le Harare umnumzana Bernard Manyenyeni ukuze bazwisise ngodaba lokususwa kwabo ezitaladeni zedolobha leli wabazisa ebakhombisa lencwadi etshengisa ukuba umnumzana Ignatious Chombo nguye obhalele omasipala bonke hatshi I Harare kuphela ebapha umlayelo wokususa abantu abathengisa ezitaladeni njengokucasisa kuka mnumzana Elijah Mutemeri ongumgcinisihlalo wenhlanganiso ye Chamber of Informal Economy.
UNkosikazi Charity Mabhiza othengisa inhlanzi lamagwili esithaladeni uHarare Street uthi kayindawo amapolisa aze afike ezomsusa ngenkani ngoba engelayo enye indlela angondla ngayo imhuli yakhe.
Umnumzana Joseph Majoni othengisa ama ball-point pen kunye lamasokisi abesilisa esithaladeni uJulias Nyerere uthi bavele bathengisa bengela mvumo njalo bazaqubekela phambili bethengisa kungelani lokutshiwo nguChombo ethi angabasusa bazaphenduka.
U Mutemeri uthi leli nyathelo likahulumende Lilakho ukuphazamisa impilakahle yemhuli ezinengi. Uthi kuyadanisa kakhulu ukuba uhulumende uthatha inyathelo elinje engazisanga uzulu ngokuqondileyo isikhathi sisasekhona njalo engela nyathelo alalo lokunikeza abantu abanje indawo ezinye zokusebenzela kizo ethi kudingakala ukuba lokhu kulungisiswe kuqala.
Ingcwethi ezicubungula ezombusazwe uthi kukhanya uhulumende esenza lokhu ngenjongo yokususa abantu lengcekeza ezitaladeni ngaphambilini komhlangano wamazwe angezansi kwezwekazi leafrica awe SADC okhengelelwe ukwenzelwa eZimbabwe ngenyanga kaMabasa njengoba umongameli Robert Mugabe esengumgcinisihlalo we African Union kodwa abantu belakho ukubuyela kwelakusasa.
Uhulumende yena uthi abantu bephula umthetho wama khansili ngokuthengisela ndawana zonke bengela mvumo njalo bengabhadali imithelo bethi lokhu kulakho ukubangela inxabanxoza lemikhuhlane emadolobheni.