Liviki kuhlelo lwethu Liphuma Lendaba Litshona Lendaba sixoxa loMnumzana Mojalifa Mukwele owenhlanganiso ye Zimbabwe Sexual Rights Centre elwela ilungelo labathengisa imizimba.
NgoLwesibili idale elibona ngezesisekelo sombuso welizwe, iConstitutional Court, liphe isinqumo sokubana amapholisa kawalamvumo yokubopha abesifazane abatholakala bezihambela ebusuku.
Lokhu kutsho ukuthi labo abathengisa imizimba kabasamelanga babotshwe nxa besenza umsebenzi wabo.
Kusukela ilizwe lithola uzibuse amapholisa asefeze inhlelo ezimbalwa ezokubopha abesifazane abatholakala esitaladeni ebusuku. Lezinhlelo zibalisa o-Operation Chinyabada labo Operation Chipo Chiroworwa lapho okwabotshwa khona abesifazane abanengi.
Abanye ababebotshwa kulezinhlelo babesiwa emapulazini lapho ababephiwa indawo zokulima baziphathise kodwa inengi labo lalihle liphange libuyele ezitaladeni.
UMokwele uthi isinqumo esithethwe ngumthethwandaba sitshengisa ukuthi amapholisa ebesephula ilungelo loluntu.