amalinks wokungena

Breaking News

Ontanga Batshengisela eHarare Besithi Kahambe uMakarau


Justice Rita Makarau
Justice Rita Makarau

Abomanyano wabontanga owe National Youth Action Alliance batshengisele ngoLwesihlanu eHarare befuna umgcinisihlalo we Commission ebona ngezokuqhutshwa kokhetho, eye Zimbabwe Electoral Commission – ZEC, unkosikazi Rita Makarau, atshiye umsebenzi.

Ontanga phose ikhulu abesebenza ngaphansi komanyano we National Youth Action Alliance, batshengisele besuka emahofisini amakhulu kamanisipala eHarare aweTown House, belubhekise emahofisini ale iCommission ebona ngezokhetho elizweni eye ZEC. Ontanga laba bebetshaya impembe bebanga umsindo ngesikhathi befola.

Abasakhulayo laba, abekade bethwele amabhakana abelotshwe imibiko etshiyeneyo, bayetshiya incwadi yezikhalazo ehofisini yomgcinisihlalo we ZEC, unkosikazi Rita Makarau, bethi kumele atshiye umsebenzi ngoba engelawo amandla phezu kogwalo olulotshwa amagama abalelungelo lokuvota – i Voters’ Role.

Ngesikhathi befika emahofisini kaMakarau, amapholisa alondoloza leyo ndawo, ahle avala amasango wonke kodwa omunye wabo ubesengenile ukuyatshiya ugwalo lwezikhalazo.

Okhulume phezu kwalesi sehlakalo, umnumzana Job Sikhala, owake waba ngummeli weSt Marys edale lephalamende njalo elilunga le MDC elikhokhelwa ngumnumzana Morgan Tsvangirai, ngomunye wabasayina ugwalo lwezikhalalzo olusiwe ehofisini ka nkosikazi Makarau. USikhala uthi akajatshuliswa yindlela unkosikazi Makarau aqhuba ngayo umsebenzi wokubhalisa abalelungelo lokuvhota njalo kumele atshiye umsebenzi njengamanje.

Lumbono usekelwe ngomunye wabontanga ababone lokhu kutshengisela kusenziwa e Harare ngesikhathi esedolobheni laye, umnumzana Khumbulani Dlamini. UDlamini uthi akula ngenye indlela ngaphandle kokuba uzulu atshengisele ukukhonona kwakhe lanxa kusobala ukuba zingatshywa luvalo inkokheli ezisembusweni.

Kusenjalo, unkosikazi Makarau, utshele ikhomidi ebona ngezemithetho lokwenzakala edale ye Justice, Legal and Parliamentary Affairs, ukuba abe ZEC sebeqalile ukululungisa lolugwalo lwamagama abalelungelo lokuvhota, ethi ukhetho oluzakuqhutshwa ezigabeni ezibalisa ese Chirumanzu-Zibagwe le Mt Darwin West, luzakwenziwa kusetshenziswa ugwalo olutsha lolu.

Isisekelo esitsha sombuso sikubeka sobala ukuba sekumele kube ngabenhlanganiso ye ZEC abaluqoqayo lolu gwalo, hatshi ihofisi ka Mudede njengalokho obekusenziwa eminyakeni edlule.

Kuthe sebetshengisele emahofisini e ZEC la, lapho bagiye behlabela ingoma zomdabu, abekade betshengisela laba baqhubeke befola phakathi kwedolobha bethwele amabhakana abo begiya lokutshaya izilogan.

Kodwa bacine bexotshaniswa ngamapholisa akade ehlomile sebefika bucwadlana lezakhiwo zedale lephalamende, lapho abakade behlose ukuyakwethula njalo enye incwadi yezikhalazo.

Abanye balabo abasaine lolugwalo babalisa umkhokheli welinye lamacele e MDC, umnumzna Morgan Tsvangirai, okhokhela ibandla le Mavambo/Kusile/Dawn-MKD, uDr Simba Makoni kanye lonobhala jikelele kwelinye njalo lamacele e MDC le MDC Renewal Team, umnumzana Tendai Biti kanye lamanye amalunga edale laphalamende.

Ngakolunye udaba njalo oluphathelene lezokhetho, okhokhela omahluli elizweni, u Chief Justice Godfrey Chidyausiku, lamuhla ubethe amagama abomahluli abazaphatheka ekuthoniseni amacala aphathelene lezokhetho okwenyanga eziyisithupha ezilandelayo.

Laba ngababalisa o Justice Chinembiri Bhunu, Tendai Uchena, Martin Makonese kanye loJustice Andrew Mutema.

XS
SM
MD
LG