Lanxa uhlelo lukahulumende weMelika olujonge ukuthuthukisa abasakhulayo beAfrica olweMandela Washington Fellowship lugqitshwe ngenyanga edluleyo, bakhona abalutshwana abagoqela abasakhulayo beZimbabwe abasele ngemuva besebenza lamankampani atshiyeneyo belolonga ubungcitshi babo.
Abanye babo abangamatshumi amabili lanhlanu sebabuyela eZimbabwe, kodwa abahlanu laba basele besebenza lamankampani eMelika atshiyeneyo bedinga ulwazi olujulileyo emisebenzini abayenzayo.
Omunye wabasakhulayo laba nguNkosikazi Irene Chikumbo, oyingcitshi kwezokukhulumisana ngemitshina yakulezinsuku njalo ongomunye wabasungula inkampani ethiwa yiHypercube Hub.
UChikumbo usele esebenza logatsha lukahulumende olwe U.S. African Development Foundation, lona olukhangelane lokusekela inhlelo zentuthuko kwezamabhizimusi ezwekazi leAfrica.
UChikumbo utshele iStudio 7 ukuthi kunengi asekufundile kugatsha lolu ngendaba zokuthuthukisa amabhizimusi amancane ikakhulu asacathulayo.
Omunye njalo nguNkosikazi Abigail Muleya, osebenza lenkampani ecebisa lokuxwayisa amabhizimusi amakhulu eyeDeloitte Consulting.
Inkampani le ngenye yamankampani amakhulu emhlabeni jikelele enza lumsebenzi agoqela iErnst & Young, Price Water House Coopers leKPMG.
EZimbabwe uMuleya usebenzela inkampani ethuthuthikisa abesifazana kwezamabhizimusi eBinga iZubo Trust, ehlaziya inhlelo zayo.
Kunkampani yeDeloitte Consulting, uMuleya wenza umsebenzi ofanayo, kodwa umahluko yikuthi usehlaziya inhlelo zamankampani amakhulu ahloniphekayo agoqela ibhanga lomhlaba, eleWorld Bank.
"Umsebenzi engiwenzayo ngiwubona umuhle kakhulu ngoba uzangakha kuphinde kunginike amanye ama-skills," kutsho uMuleya.
UMnu David Chakombera yena usebenza lenkampani kahulumende weMelika encedisa amankampani akuleli azimeleyo ukusungula amabhizimusi emazweni alenotho esathuthukayo, iOverseas Private Investment Corporation, OPIC.
UChikombera uthi ukusebenza lalinkampani sokumvule ingqondo njalo selolwazi olujilileyo ekuthini osomabhizimusi abacathulayo bengaludinga ngaphi uncedo olufaneleyo olokusungula kanye lothuthukisa amabhizimusi abo.
Abanye babasakhulayo laba nguTakunda Chingonzo yena ocele uMongameli Obama emhlanganweni weU.S.-Africa Summit ngenyanga edluleyo ukuthi esule izijeziso ezafakelwa eleZimbabwe yiMelika ngoba ziphambanisa abamabhizimusi, kanye legqwetha uNkosazana Rumbidzayi Dube.
Abahlanu laba bakhangelelwe ukuqeda inhlelo zabo ekupheleni kwenyanga ezayo.