Abatshayela izimota ezithwala impahla, zenkampani yakwele South Africa eyeManline Freight, beyizizalwane zeZimbabwe, abalokhe bekhalala umsebenzi kusukela ngeviki edluleyo bathi lokhe ziqonga inking ababhekane lazo. Inkokheli yalenkampani le ibikwa isizama ukubathathela lezimota ngendlela ezingaqondanga ukuze zibuyiselwe kwele South Africa ngoba abatshayeli besala lamakhiye nxa udaba oludale lokhu kufuthelana lulokhe lungakalungisiswa.
Abatshayeli laba batshele intathelizindaba ukuba bamangele ngoLwesine ebusuku, iziphathamandla zalenkampani ezivele kweleSouth Africa, iziphathamandla zenkampani ebona ngezokulondolozwa kwempahla yeEasy Track, amalunga enye yenhlanganiso ezimela amalungelo ezisebenzi esebenzelana lebandla elibusayo leZanu PF yeFederations of Trade Unions-ZFTU kanye lamapholisa abekhokhelwa nguSuprintendant Mashuro, beye lapho kumiswe khona lezi mota eHarare, bayazivula befuna ukuzitshayela besebenzisa amanye amakhiye.
Ibikwa ingasaphumelelanga limizamo iqula leli lethuswe yikuza kwabanye babatshayeli laba.
Abatshayeli laba bathi babona lesi senzo kuyimizamo yenkampani abayisebenzelayo ye Manline, yokufuna ukubagcona kuthiwe yibo abantshontshe loba ukubhidliza impahla yenkampani le ngoba izimota sezingasabonakali.
Omunye walaba batshayeli ongathandanga ukubethwa ngegama utshele iStudio Seven ukuba imizamo yabo yokusa loludaba enkambeni yamapholiksa eye Waterfalls, ngendlela yokuzigeza kulokho kuvulwa lokuthathwa kwempahla kulezo mota, akuzange kwamukelwa. Uthi bamangaliswe yikuba endaweni yokuba lulalelwe udaba lwabo ngamapholisa, bamane batshelwa ukuba behlukane lalo.
Kodwa amapholisa manye abonakale esekhulumisana lequla lenkhokheli yeManline eliye mangalela abatshayeli laba besetheswa umlandu wokuba lodlakela.
Wengeze ethi kubavelele sobala ukuba amapholisa asebenzelana laleliqula ukubancindezela kuzikhalazo zabo endaweni yokuba aluhluzisise kuvele ukuba vele kuyini isisusa salo.
Uqinise elokuthi yena labanye bakhe kabayi kubuyela emsebenzini nxa zingakalungiswa izikhalazo zabo, kungagcono uphele umsebenzi kodwa bekutholile okungokwabo.
Abatshayeli laba baveze njalo ukuba bamangaliswa yikwenza kwaleliqula lisebenzelana lamalunga eZFTU kanye lamapholisa emizameni yokufuna ukuyazithatha ngodli izimota ngemva kokwalelwa ngumthethwandaba waphezulu oweHigh Court ngoLwesithathu, ukubatholisa incwadi ebavumela ukwenze lokhu.
Bathi le bekuyindlela yokwenza abatshayeli laba baphethe sebesetheswa umlandu wokubhidliza loba ukuntshontsa impahla yalenkampani njengoba leliqula litshiye lonile ngokuzivula okungekho emthethweni kwathathwa lamaphepha aqakathekileyo achaza uhlobo lwempahla ebiphakathi.
Abatshayeli laba bethesa inkampani abayisebenzelayo umlandu wokungabanaki inkokheli zikhetha ukuthatha lindlela yempi endaweni yokuba balungisise okuyiyona ndaba esegudwini,yokwephulwa kwamalungelo abo njengezisebenzi.
IStudio Seven kayisanelisanga ukukhulumisana leziphathamandla zeManline, uSuprintendant Mashuro kanye lonobhala jikelele enhlanganisweni emela izisebenzi ye ZFTU umnumzana Kennius Shamuyarira otshele laba batshayeli ukuba yena ungumtakamuyi umnumzana Nathan Shamuyarira njalo ebethusela ukuba yena ulilunga elilesikhundla saphezulu ebandleni le Zanu PF.
UShamuyarira lequla lakhe ebelivele enhlanganisweni yeZFTU, ubikwa enguye njalo oke wabethusela ngoLwesibili, ethi usebenzela ehofisini kamsekeli kamongameli umnumzana Emmerson Mnangagwa ngakho uthunywe ukuzabazisa ukuba babuyele emsebenzini.