amalinks wokungena

Breaking News

Batshona Besenzani Abokhekhe Ngesikhathi Izikolo Zivaliwe Kulikhefu


Abantwana bedlala
Abantwana bedlala

Ukudlala yikho okuyabe kusemqoka empilweni zabokhekhe ngesikhathi behlabe ikhefu izikolo zivaliwe.

Pho ke njengoba lezindawo azisasebenzi njengakudala kungenxa yesimo somnotho esimi lugege sithe kesikhangele ukuba bazilibazisa njani abokhekhe ngesikhathi kulikhefu kunje.

Umfanyana oleminyaka elitshumi lambili u-Andile Nyathi uthi yena utshonela ukudlala ibhola lenyawo.

Umdlalo wenguqu kukhanya yiwo othakazelelwa ngabanengi abasakhulayo ikakhulu emalokitshini mhlawumbe kungoba ungadingi izinto ezinengi zokusebenzisa njengoba abantwana belakho ukudlala loba elamaphepha bengagqokanga lasenyaweni.

Kodwa loba kunjalo untombazana oleminyaka elitshumi lanhlanu uCatherine Moyo uthi yena uyehluleka ukuwudlala lumdlalo ngoba amaqembu amantombazana adlala umdlalo wenguqu engekho amanengi.

Kweyinye inkundla eselokitshini le Nkulumane sithole abafana abanengi kuyilabo abaleminyaka engaphansi kwelitshumi lane kuthi labo abakhulu kulalapho bebembalwa nje.

Omunye wabo uMoses Jiriengwa uthi lesi simo senziwa yikuba laba asebethe hluthu bayabe sebeqala ukugijimisa impala ezinengi yikho bengasela thando lokuzilolonga kodwa bayabe bebonakala mzwana womdlalo.

Izikolo ziyavulwa ngeviki ezayo mhla ziyithoba minwe mbili njalo i themu yesithathu kulapho okubhalwa khona imihloliso eqakathekileyo.

Le ngeyinye imbangela eyenza ukuba izingane ezizaloba imihloliso ka Grade 7 leka Form 4 zingatholakali endaweni zokuzilibazisa njengoba ziyabe zitadisha.

Umdlalo wenguqu yiwo ovamileyo ikakhulu emalokitshini ako Bulawayo lokhu kungoba inkundla zokudlalela eminye imidlalo zingatholakali kuwo wonke amalokitshi ikanti uAbel Mathema uthi lendleko ezidingakala ukuba umntwana adlale eminye imidlalo zenza abazali bangabaphi imvumo.

Ngensuku zakudala abasakhulayo bebephatheka ezintweni ezinengi ezokuzilibazisa ezingasizo zemidlalo kuphela kodwa ebezigoqela ngitsho lasibi se ball room dancing.

Isimo sesaguquka njalo kulezinsuku abantwana kabaselawo lawomathuba yikho nje umdlalo wenguqu kuyiwo nje onguthenjiwe ngoba ontanga bedinga igceke nje kuphela lebhola ukuba zisukelane ikanti eminye imidlalo enjengabotennis, basketball, ukubhukutsha leminye iyabe idinga inkundla kanye lokokusebenzisa okuthile.

XS
SM
MD
LG