amalinks wokungena

Breaking News

Abe Econet Wireless Basungula Uhlelo lweEcoShopper


Abenkampani yeEconet Wireless bemanyene labe National Foods baphawule uhlelo olutsha lokuthenga impahla yokudliwayo lezinto zokusebenzisa ngekhaya olwe EcoShopper, kusetshenziswa indlela yeEcoCash.

Okhokhela uhlangothi lwezokuthuthukiswa kwemisebenzi kulenkampani kanye lokuyikhankasela, uNkosikazi Natallie Javangwe Morris, utshele uzulu obesemkhosini owenzelwe eweteleni ye Meikles ngoLwesibili ekuseni wokuphawula lolu hlelo okusemthethweni, ukuba uhlelo lwe EcoShopper lusungulwe ngenjongo yokwenza kube lula kuzulu, ukuthengela izihlobo labazali impahla edingakalayo.

Unkosikazi Morris uthi luhlose njalo ukuphathisa labo abafisa ukuqhuba ibhizimusi lokufuya inkukhu, ethi ngoba sekuzakuba lula ukuthenga amatsiyane lokudla okuphiwa inkukhu, umuntu esebenzisa lindlela ye EcoShopper, ebhadalela nge EcoCash.

Kodwa umnumzana Masimba Kuchera uthi le yindlela esisetshenziswa yilenkampani ukuthola imali kuzulu ngamaqhinga ehlukeneyo ethi kuyamele uzulu aluhluzisise anduba alusebenzise lolu hlelo.

Okwamanje abe Econet bathi basasebenzelana labenkampani ye National Foods, belombono njalo wokuzasebenzelana lamanye ngesikhathi esizayo.

Labo abazathengelwa impahla phansi kwalolu hlelo babikwa bezakwanelisa ukuyayithatha yiloba kungaphi kwelizwe njengoba zisedlula amatshumi amahlanu, ingatsha zalenkampani ye National Foods ezisabalele ilizwe lonke.

XS
SM
MD
LG