Uhlangothi olukhangela ngokubuthaniswa lokugcinwa kwegazi, iNational Blood Service Zimbabwe ithi isiqala umkhankaso wokudinga igazi elingaba ngama units aphezu kwenkulungwane ezilitshumi ukuze libe lakho ukuphathisa abazalidinga ngesikhathi sekhefu leKhisimusi esivame ukuba lengozi ezinengi zomgwaqo.
I-NBSZ ithi iyaqala lumkhankaso kuyonale iviki emadolobheni abalisa akoBulawayo, ePlumtree le Gwanda ukudinga igazi elingama units azinkulungwane phose ezilitshumi lane-13 700 kungakafiki ikhefu leKhisimusi.
Okhangela ngokuhanjiswa kwemibiko kuloluhlangothi eMatabeleland, uMnumzana Sifundo Ngwenya , uthi imikhankaso le ijonge ukukhuthaza ontanga okuyibo abavame ukupha igazi, inengi ekade libhala imihloliso kunyanga ezisanda kudlula. Uthi ngaphandle kwabontanga badinga ukukhuthaza labadala njalo bakhankasele ukuqeda ingozi zemigwaqo bephathisana lenhlanganiso ezigoqela iTraffic Safety Council of Zimbabwe, iVehicle Inspection Department kanye lamapholisa iZimbabwe Republic Police.
Osakhulayo, uNkosazana Amanda Sithole ohlala edolobheni lakoBulawayo, uthi uyafisa ukupha igazi kodwa kavamanga ukuzwa ukuthi lumkhankaso wenzelwa ngaphi njalo ngobani abalakho ukupha igazi. Uthi kuhle ke nxa kuzakuba lalo umkhankaso ngoba banengi abafuni ukuphathisa kodwa bengazi ukuthi bayengaphi.
UMnumzana Jerry Mpofu, oyisakhamuzi emzini weMagwegwe koBulawayo, uthi kuqakathekile ukuthi abantu baphatheke ekunikeni igazi kodwa inengi labantu ikakhulu asebekhulile bathikaza ngenxa yokungabi leqiniso ngesimo sabo ukuthi balegcikwane lengculaza kumbe hatshi. Uthi lokhu kwenza abantu besabele khatshana abanye kungabesaba umnyama ongelampisi.
Isakhamuzi njalo, uMnumzana Bhekimpilo Nyathi, uthi inengi labantu alinanzeleli ukuqakatheka kwegazi ezibhedlela baze bazithole sebekusimo esibi kumbe belesihlobo esehlelwe yingozi yomgwaqo igazi lingasekho. Uthi ikhefu liqala nje bekungaba kuhle ukuthi uzulu asukumele phezulu ayekupha igazi kungakabi lomonakalo ngoba ungabengisazi kancedi nxa esechithekile angeke abe esabuthwa.
I-Traffic Safety Council of Zimbabwe ithi nyakenye kwaba lengozi zomgwaqo phose inkulungwane – 822, ngekhefu lekhisimusi. Ukupha igazi kuqala ebantwini abaleminyaka engaphezu kwetshumi lesithupha -16, abaphilileyo emzimbeni. Lanxa igazi lithengiswa, labo abayabe sebephe igazi okulitshumi ababhadali kanye lemuli zabo lapho belidinga. Ngimele iStudio Seven koBulawayo, nginguNothando Sibanda.