Izakhamizi zeHurungwe West esabelweni se Mashonaland West zibikwa zingajabuliswa linyathelo elithethwe libandla leZanu PF lokuxotsha umnumzana Temba Mliswa ebandleni yena engonanga lutho. Abasekeli beZanu PF laba babikwa besithi bafuna uMliswa ukuthi acintise kukhetho lweBye-election ezimele nxa kuthe kwadingeka ukuthi lwenziwe njalo bazamsekela.
Lokhu kuphume emhlanganweni owenziwe kulesi sigaba lapho amalunga eZanu PF ekubeke sobala ukuthi azosekela uMliswa nxa engancintisa ezimele ngemva kokuxotshwa kwakhe ebandleni kumaviki amabili edluleyo.
USobhuku Modekai Chareya nguye obikwa esungule udaba lukaMliswa ngokuthi kasukume emhlanganweni lowo azise umhlangano ukuthi uyemukela na ukuncintisa kulolu khetho engameli bandla kodwa emela uzulu njenge Independent. UMliswa ubikwa evumile phambi kukazulu ukuthi uzoncithisa kulolu khetho njengokucelwa kwakhe ngabantu beHurungwe West abathi balethemba lobukhokheli bakhe.
Lumhlangano ungenwe ngabagcinizihlalo benhlangothi zabasakhulayo lezabesifazana eziqintini ezilitshumi lathoba minwe mibili, induna zalumango osobhuku Kanye labalwa impi yenkululeko.
Umhlangano weHurungwe West wenzelwe esikolweni seKarambazuntu uhlose ukuthakazalela ukuphumelela emihlolisweni kwabantwana besikolo lesi ngesilinganiso esiphezulu esabelweni seMashonaland West kodwa ucine usuhluza indaba zombusazwe. Abantu bacina beveza ukungaphathwa kuhle ngokwenzakala ebandleni leZanu PF langokungena kwezombusazwe komkakhe kamongameli unkosikazi Grace Mugabe obangele ukuxotshwa kweziphathamandla ezinengi ebandleni lakuhulumende okugoqela unkosikazi Joice Mujuru, uMliswa labanye.