amalinks wokungena

Breaking News

AbeMDC Basola uMugabe Ngodaba Lomnotho


Amacele eMDC sesole kakhulu amazwi kaMongameli Robert Mugabe awokuthi umnotho welizwe suqalisile ukuthuthuka.

Ekhuluma eHarare ngeSonto, uMugabe uthembise uzulu ukuthi umnotho usendleleni eqondileyo njalo uhlelo lweZimAsset ludlala indima enkulu ekuvuseleleni lumnotho.

Kodwa amacele womabili eMDC athi uMugabe uyaphosisa nanku amankampani eqhubeka evalwa njalo lemisebenzi isilela.

"Akutshoyo nje umunt'omdala yize leze ngoba uswele into angayikhuluma ebambekayo ngemva komnyaka bethe bona nxa bewinile ivoti bazavusa umkhonomi," kutsho isikhulumeli seMDC ekhokhelwa nguMnu Welshman Ncube, uMnu Nhlanhla Dube.

Amazwi kaDube agcizelelwe ngumsekeli kamabhalane obona ngokuqhutshwa kwenhlelo zeMDC-T uMnu Abednico Bhebhe.

"UMugabe segugile, kasaboni okubonwa ngabantu abatsha abanjengathi, kasakuboni okubonwa nguzulu wonke weZimbabwe odubekileyo, swele imali," kutsho uBhebhe.

Kodwa isikhulumeli seZanu PF uMnu Rugare Gumbo usekele amazwi kaMugabe esithi akulalutho oluhle abeMDC abangalutsho ngoMugabe leZanu PF.

"Ungazihlupha ngabantu beMDC, yikho abakukwanisayo ukuphong'khuluma lokuwwumana," kutsho uGumbo.

"Iqiniso yikuthi i-economy yethu isitshintsha... kulezinto ezinenzi ezenzakeleyo. Umumbu sasithenga kwamanye amazwe, kodwa kathesi abantu balomumbu wabo njalo bayawuthengisa kuGMB. Lokhu kutshengisa ukuthi inotho sivukile."

Kunjalo nje umphathinmtambo wezemali uMnu Patrick Chinamasa utshele idala lephalamende ngoMvulo ukuthi ngaphandle kokuthi kuvuselelwe amankampani, akulandlela umnotho welizwe ongavuswa ngayo ubuye ume ngezinyawo njalo.

Wengeze wathi imizamo yakhe yokudinga imali yokuvuselela umnotho iphanjaniswa yizijeziso athi zafakelwa ilizwe ngamazwe angentshonalanga.

XS
SM
MD
LG