Abalwela amalungelo abesifazane bathi inhlolisiso asebeyenzile iveza ukuba inengi labesifazane selisesaba ukuphatheka kungxoxo eziphathelene lokudinga indlela zokuletha ukuthula elizweni ngoba betshiywa ngaphandle bengaqakathekiswa lanxa beyibona abalehlandla lamandla wokwenze lokho nxa bengatholiswa ithuba ngokugcweleyo kundaba zokulondoloza lokukhuthaza ukuthula elizweni.
Lokhu ngokunye kokuphume emhlanganweni wokwethula impumela yenhlolisiso yokuphatheka kwabesifazane kunhlelo zokuletha ukuthula lenhlalakahle elizweni, eyaqhutshwa ngabenhlanganiso ye The Women’s Trust, endaweni ezibalisa i-Mazoe, Goromonzi, Marondera le Chitungwiza.
Umqondisi walenhlanganiso unkosazana Memory Kachambwa, utshele lumhlangano owenzelwe e weteleni ye Crown Plaza, ukuba inengi labesifazane kungakhathalekile ukuba kusemaphandleni loba edolobheni, besesaba ukunikeza imibono yakhe lapho kuxoxisanwa ngezokudinga indlela zokuletha ukuthula lenhlalakahle laloba besazi ukuba balalo lelo lungelo ngoba besesaba.
Kuthi okhankasela ukulandelwa kwesiko lesintu, unkosazana Luta Shaba, yena utshele umhlangano munye ukuba kuqakathekile ukuba sikhangelwe isisusa salokhu kwesaba kwabesifazane ukuphatheka ngokugcweleyo kundaba zentuthuko okubalisa ezokuletha ukuthula elizweni kusukela ezigabeni zabo.
Wengeza uShaba ethi udubo yimithetho esetshenziswayo athi ngeyokuza,esuka yenze owesifazane esabe ukutsho lalapho ilungelo lakhe lisephulwa, ngoba uzabangela ukungezelelwa komonakalo ngoba ikhuthaza ukujeziswa kukamadala icala ikanti indlela yesintu kusukela endulo zikhuthaza ukuhlawulwa kanye lokuxolelana.
Obona ngenhlelo enhlanganisweni ye The Women’s Trust, unkosazana Barbra Ncube uthi inhloso yalumhlangano yikubonisana phezu kokungenziwa ngowesifazane ukuba aphatheke laye kuzo zonke indaba eziphezu kwenhlalakahle lokuqedwa kodlakela elizweni njengoba elakho ukukhalipha ekulondolozeni ukuthula lokumanyanisa imhli.
Omunye wabafundisa esikolo semfundo yaphezulu e University of Zimbabwe u Proffessor Rudo Gaidzanwa, obekulomhlangano laye, yena uthi udubo olukhona yikukhangela indaba zokulondoloza ukuthula njengezempi sikhathi sonke. Uthi uGaidzanwa isimo elizweni asitsho ukuba kulokuthula okugcweleyo kodwa uzulu ikakhulu abesifazane, uyesaba ukutsho okusenhliziyweni yikho bezithulela abanye besiba lomcabango wokuphuma elizweni ngoba ingekho inhlakahle njalo bengelaye abangakhulumisana laye kungela kucabangelana.
Ukhuthaza abesifazane ukuba babomanyana bakhulume ngalizwi linye ukuze zizwakale izikhalazo abalazo,baphatheke ngokugcweleyo kizo zonke inhlelo zentuthuko elizeweni okubalisa ezokuletha ukuthula okungaphathisa ekuthini kube khona ukuthula uqobo elizweni hatshi isimo ilizwe likiso okwamanje.
Lokhu kugcizelelwe ngumgcinisihlalo wenhlanganiso ebona ngezokuqhutshwa kokhetho elizweni eye Zimbabwe Electoral Commission, uCommissioner Joice Leticia Kazembe uthi kuqakathekile ukuba ube khona umanyano ogcweleyo phakathi kwabalwela ilungelo labesifazane, bafinyelele kuye wonke umuntu hatshi ukuqhuba limihlangano emaweteleni lasemadolobheni kuphela njengalokho okuyikho khona okwamanje.
Kuvunyelenwe kulomhlangano ukuba kumele lezinhlanganiso ezilwela ilungelo labesifazane, ziphatheke emikhankasweni ezakwenza inkokheli zilandele lokho okumunyethwe yisisekelo sombuso welizwe phezu kokulinganiswa kwamathuba phakathi kwabesilisa labesifazane.
Bathi isekelo lesi simumethe okunengi okulungele abesifazane kodwa nxa inkokheli zingasatshutshiswanga ukuba zikulandele, kuyakuba ngokutholakala kuso kuphela, kungalandelwa ukuze abesifazane bazi ukuba balendima enkulu abangayidlala kunhlelo zelizwe, ikakhulu ekuletheni ukuthula okugcweleyo.
Abekade bekulomhlangano abavele emabandleni ehlukeneyo ezombusazwe bakhuthazwe ukuyankankasela ukuthuthukiswa kwabesifazane emihlanganweni yabo ye Congresss, azakwenziwa ngamabandla abalisa ele Zanu Pf lele MDC elikhokhelwa ngumnumzana Morgan Tsvangirayi, ngoba kulapho okuthathwa izinqumo ezilandelwa enhlelweni zentuthuko yelizwe kakhulukazi abebandla elibusayo.
Umhlangano walamuhla oqoqwe ngumanyano wenhlanganiso ezinhlanu, ezikhokhelwa ngeye The Women’s Trust, ngokuphathiswa yinhlangiso ye Diakonia, wangenwa zinkokheli enhlanganisweni ezilwela ilungelo loluntu okubalisa eye Padare/Enkundleni, Musasa Project, Female Students Network, Nyahunure Community Trust, leye Zimbabwe Young Women’s Network for Peace Building.