Kulandela umkhosi wokunanza ilanga leWorld AIDS Day owedlule ngoMvulo, kanye lowe 16 Days of Activism Against Gender-Based Violence osaqhubeka, inengi liyavumelana ukuthi ukuhlukuluzwa kwabesifazana labantwana yikho okubangela ukumemetheka komkhuhlane wengculaza ngoba bengelamandla okuzivikela.
Ekhuluma kweminye yale imikhosi, uMayor wedolobho leGwanda uMnu. Knowledge Ndlovu ubikwa exwayise abesilisa ukuthi bengadlwenguli abesifazana labantwana ngoba kulihlazo. Wengezelele wathi iMatabeleland South ngesinye sezigaba zelizwe esilamanani aphezulu awokudlwengulwa kwabantwana, ukuhlukuluzwa kwabesifazana, kanye lokuzithwala kwamantombazana amancinyane.
Ukuze sizwe okwenzakala eMatabeleland North ngaloludaba, sixoxe loKhansila Esau Sibanda kaWard 19 eDaluka eLupane.
UKhansila Sibanda utshele uSithandekile Mhlanga weStudio 7 ukuthi kulendlela ikhansili yesigabeni sakhe esebenza ngayo eyokuhlolisisa ukuthi abantwana baphethwe njani emulini zabo lezikolo.
