Inhlanganiso ye African Forum and Network on Debt and Development- Afrodad ikhuthaza amazwe awezwekazi le Africa ukuba atshiyane lomkhuba wokuthembela emalini zokweboleka aqinise indlela zokubuthelela ngazo imithelo.
I-AFRODAD etshengisa ingwalo zayo embukisweni weZimbabwe International Book Fair yalonyaka oqubekela phambili eHarare ithi inhlolisiso eyayenzayo ikhomba ukuba ukuthembela ekukhweledeni izimali ngamazwe akuleli zwekazi ayisiyo ndlela elakho ukuliphathisa.
Umnumzana Thulani Nkomo walinhlanganiso uthi ukwenza lokhu kucina kungenisa abantu makhaza enkingeni zobuyanga. Uthi okudingakalayo yikuba amazwe akuleli zwekazi afunde ukusebenzelana ndawonye labantu makhaza kunye lamadale ephalamende eqale ngokuvumelana engakayikweleda izimali enhlanganisweni ezifana le IMF, World Bank lezinye ethi indlela ekhanya isamukeleka yikusebenzisa imithelo.
U Nkomo uthi noma umbukiso we Book Fair usiya usehla ngokudanisayo lokhe ubaphathisa ukuba baveze imbono yabo kuzulu ethi lamhlanje benelise ukuhlangana labantwana bezikolo, abammeli bamanye amazwe eZimbabwe, kunye lequla lamalunga esiphala samabhuku edale lephalamende lakwele Melika ele Congress.
Lumbukiso ungenwa ngabadinda amabhuku, inhlanganiso ezitshiyeneyo kunye lamakolitshi emfundo yaphezulu.
Umnumzana Dick Masala osebenzela ugatsha lokudindwa kwamabhuku ekolitshini le University ye Zimbabwe uthi batshengisa ingwalo abazidindayo ikakhulu ezimayelana lenhlolisiso ezitshiyeneyo abazenzayo. Uthi udaniswa yikwehla kombukiso we Book Fair kulezi nsunku ethi noma kunjalo baqubekela phambili besekela ukuze umbukiso lo uqubekele phambili. Uthi umuntu wonke ongaba esenza ezokucubungula kumbe i-research ulakho ukubuya kibo ethole usekelo losizo kulokho ngoba bengameleli abantu abasebenzela ama university kuphela.
Umbukiso walamhlanje ungenwe ngabantwana bezikolo ngobunengi babo abanye bebuya ngamabhasi njalo bephatheka ekufundweni kwengwalo lapho abahlangana khona labalobi balezongwalo okugoqela I children s reading tent. I Book fair yalonyaka iphela ngoMgqibelo.