Izakhamizi kanye lengcwethi ezicubungula ezenotho zithi kumqoka ukuthi uhulumende ekwabeni imali aqakathekise uhlangothi lwezempilakahle ukuze luqhubeke luthuthukisa inhlelo ezifana lokuqeda udubo lwabesifazana abalahlekelwa ngumpefumulo bebeletha kanye lengculaza.
Uhlangothi lwezempilakahle lonyaka belusebenze ngendlela encomekayo kakhulu ekuqedeni ukumemetheka kwengculaza, ukwehlisa inani labesifazana elifa libeletha kanye lokuqeda imikhuhlane yoqhuqho kanye lofuba.
Phezu kwalokhu, uhlangothi lolu lwenelisa ukuxakulula amaphahla ayezelwe ebambene esiswini, obekungumsebenzi wakuqala ukuphathwa kuleli ngodokotela labosiyazi bakuleli.
Lanxa konke lokhu kuncomeka, abacubungula ukuhlala kukazulu, bathi kuyakhathaza ukuthi nxa kukhangelwa ukwabiwa kwemali ku-budget, kukhanya inengi lemali liyaphelela kuholo lezisebenzi kungela eyokuthuthukisa izibhedlela, ukuthenga imithi kanye lemitshina etshiyeneyo kanye lokwehlisa indleko zokwelatshwa.
UMnumzana Khumbulani Maphosa, osebenza kwezamalungelo oluntu, uthi ibudget yalonyaka iveza ukuthi uhulumende kaqakathekisi ilungelo lempilakahle kazulu ikakhulu nxa kukhangelwa umumo wezibhedlela zakuleli esezitshiye abalemali besiyadinga ukwelatshwa phandle kwelizwe kuthi abangela zikhwama ezikhudumalayo bafe langemikhuhlane ebingelapheka. Uthi ingcwethi kwezenotho yelizwe sezike zatsho ukuthi indlela i-budget yomnyaka ozayo ehlelwe ngayo akusoze kubelemali yokuthuthukisa ezempilakahle okuluhlangothi olulokhu ludinga usekelo kulandela iminyaka eminengi lingathuthuki.
Unkosikazi Mabel Nsingo, oyisakhamuzi, uthi uhulumende uzamile kakhulu ukuthuthukisa uhlangothi lwezempilakahle kodwa ubephathiswa kakhulu yimali evela kwamanye amazwe. Uthi lokhu kutsho ukuthi uhulumende uyehluleka ukuhlela imali yakhe ngendlela, eyisebenzisa kubaphathintambo, bethenga imota okungapheliyo kodwa uzulu engatholi lutho.
Uthi lanxa kunjalo kumele izisebenzi kuhlangothi lolu zitshayelwe ihlombe ikakhulu kumsebenzi owenziwa ekhuhlukaniseni amaphahla ayezelwe ebambene esiswini ngoba lukho kuveza ukuthi ubuciko bonke obudingakalayo bukhona elizweni kuswelakala imitshina nje lemithi.
UMnumzana Japhet Dlamini, isakhamuzi sakoBulawayo, uthi kuyakhathaza ukwabiwa kwemali lokhu okungaqakathekisi imipilakahle ngoba amakhansili lawo alandela inyathelo likahulumende osokutshiye amakiliniki ekhansili engelazisebenzi ezaneleyo.
Uthi lokhu kutsho ukuthi amakliniki okuyiwo asiza uzulu asefana nje lezibhedlela ezinkulu ngokusilela kwabomongikazi labodokotela, imithi kanye lemitshina osokuzatshiya izakhamizi zingela lapho ezingaphephela khona.
Wengeze esithi imikhuhlane enjengofuba isimemetheka lula ngoba amakhansili logatsha lwezempilakahle akuselabongi abeneleyo ukuze lapho kuthe kwaba lomuntu ogulayo, kuyehlolwa lapho ahlala khona njalo kuhlolwe lalabo akhelane labo ukuze umkhuhlane uphange unqandwe.
Umnumzana Maphosa wengeze esithi ilizwe leli lisesikhathini lapho okulakho ukuqhamuka imikhuhlane yiloba yisiphi isikhathi ngenxa yobuyanga obenza abantu bangatholi amanzi ahlanzekileyo lokudla okufaneleyo.
Uthi ubuyanga benza abantu bangene engozini ngokuya emacansini bengavikelanga, abanye kungabathengisa imizimba, konke lokhu okutsho ukuthi bekudingeka imali ethe xaxa ngalesisikhathi ukuze ilizwe lingabuyeli emuva, ingculaza iqale njalo ukumemetheka.
Esethula ibudget yomnyaka ozayo, umphathintambo wezemali, uMnumzana Patrick Chinamasa, uphe imali engaphezu kwetshumi lantathu lezigidi zamadola - $13.1 million ukusekela inhlelo zokuqeda udubo lwabesifazana elilahlekelwa ngumphefumulo libeletha. Uthi imali yezinye inhlelo ezigoqela ukuqeda ukumemetheka kwegculaza kanye lokuqeda umkhuhlane wofuba loqhuqho, amadola angaphezu kwekhulu lamatshumi amahlanu ezigidi - $155.9 million, izavela kwezinye inhlanganiso ezigoqela iGlobal Fund kuthi eyokusokwa kanye lokuvikela kokuthelelwa kwensane ingculaza zibelethwa izaba sesikhwameni se United Nations Development Programme –iUNDP.
Kodwa kusenjalo, uhulumende uthi uzathengela inkokheli zomdabu imota ezibiza amadola azinkulungwane ezingamatshumi amathathu lanhlanu – $35 000 nganye.