amalinks wokungena

Breaking News

Inhlanganiso Yabalwa Impi Yenkululeko Ihlangana Lentathelizindaba


Abe nhlanganiso yabalwa impi yenkululeko eZimbabwe
Abe nhlanganiso yabalwa impi yenkululeko eZimbabwe

Inkokheli yenhlanganiso yabalwa impi yenkululenko, ekhokhelwa ngu Jabulani Sibanda, eye Zimbabwe National War Veterans Association ikhuthaze inkokheli yeZanu PF ukuba yehlukane lomkhuba wokutshotshozela ukufuthelana phakathi kwebandla njalo ingaze yabangenisa empini zabo kodwa iqhakathekise ukusebenzela uzulu njengalokho eyakuthembisa ngemva kokunqoba kukhetho.

Abenhlanganiso ye ZNLWVA bathi okwenzakala ebandleni labo kulihlazo kuzulu weZimbabwe njalo yikuphambuka njalo yikwephula lokungahloniphi izifiso zabantu. Bengeze bethi umsebenzi walezonkokheli eziphatheke kulezi zimpi kumele ube ngokowuthuthukisa umnotho welizwe, kulandelwa inhlelo ezinjenge ZIMASSET.

Embikweni owethulwe emhlanganweni lentathelizindaba, owenzelwe emahofisini alenhlanganiso eHarare lamuhla, unobhala obona ngokukhitshwa kwemibiko ku ZNLWVA,umnumzana James Kaunye uthi bakubone kufanele ukuba baqondise lokho okuphuma kumaphephandaba kahulumende okubalisa ele Herald.

Kuthi unobhala jikelele kulenhlanganiso umnumzana Shadreck Makombe uthi lalokho okukhitshwa ngamaphephandaba ukuba bebefuna ukufola besiya emahofisini kamongameli Mugabe eState House kungesiqiniso.

I Studio Seven ikhulumisane lozulu opha umbono wakhe kulokho okutshiwo zinkokheli zamalunga enhlanganiso yabalwa impi yenkululeko.

Umnumzana Mcebisi Ncube, ubaba osesemutsha njalo eyisakhamuzi se Harare, utshengise ukukhathazeka ngalokho okwenzakala ebandleni le Zanu PF ethi inkokheli idlalisa isikhathi endaweni yokuba ilungisise umumo wezenotho ongemuhle.

Lalokho okutshiwo ngamalunga enhlanganiso yabalwa impi yenkululeko kuyize ngoba bengakhulumi ngalizwi linye.

Embikweni wabo ngemva komhlangano wokubonisana phezu kwenhlalakahle yabalwa impi yenkululeko elizweni, baveze njalo ukuba labo abazithi ngama Elders, kanye lasebezibika ukuba bazinkokheli zayo, kungabantu abangekho emthethweni njalo belenhloso ephambuka kweyabo,yokungcolisa igama lalenhlanganiso lanxa abanye babo kungabalwa impi yenkululeko.

Bagcizelele kulomhlangano ukuba yinye inhlanganiso esemthethweni emela izifiso zabalwa impi yenkululeko njalo inge khokhelwa ngumnumzana Jabulani Sibanda.

Abenhlanganiso le batshele intathelizindaba ukuba bakubone kufanele ukuthi baphe umbono wabo phezu kwezehlakalo ezisebandleni le Zanu PF lokuba kuvezwe sobala ukuthi bona njengenhlanganiso bavumelene ukuba umkhokheli wabo umnumzana Jabulani Sibanda azigeze yena ngokwakhe kunkulumo yakhe yokuba akumelanga kulandelwe indaba ze “ Bedroom Coup le Boardroom politics ”.

Bakubeke sobala ukuba lokhe befisa ukubonana lomongameli Mugabe onguyena uPatron wabo, ungakaqhutshwa umhlangano omkhulu webandla, wokukhetha inkokheli owe Congress owenziwa ngoMpalakazi lonyaka. Bathi bacine ukubonana lomongameli Mugabe emhlanganweni wabo wenhlanganiso ngomnyaka ka 1992 lanxa benze imizamo embalwa eminyakeni edlule ukuhlangana laye.

Inkokheli ebezikulomhlangano lentathelizindaba, ibalisa ophethe isikhundla sokuba ngumsekeli womgcinisihlalo,umnumzana Jephat Chinake, umgciningcebo, unkosikazi Edith Kagoro, obona ngokulondolozwa kokuthula, umnumzana Adwell Bonde, unobhala jikelele kilo, umnumzana Shadreck Makombe kanye lobeyisikhulumeli sabo kulumhlangano umnumzana James Kaunye.

Umgcinisihlalo walenhlanganiso umnumzana Jabulani Sibanda ubengekho ngesikhathi lezi nkokheli zikhulumisana lentathelizindaba lanxa kunguye okhokhele umhlangano wayo we Executive ngaphambilini.

XS
SM
MD
LG