Inhlanganiso yemisakazo yezabelo eye Zimbabwe Association of Community Radio Stations-ZACRAS ithi izabamba umhlangano ozanikeza uzulu kunye labaphatheka emisebenzi yemisakazo enje ithuba lokunikeza imbono yabo kumithetho abangabe beyifuna ozalaula imisebenzi yemisakazo le.
Isiphathamandla esibona ngokuqutshwa kwenhlelo kulinhlanganiso, umnumzana Kudzai Kwangwari uthi lumhlangano uzaqhutshwa ngenyanga ezayo njalo kuzanxuswa bonke abaphatheke emisebenzini yemisakazo yezabelo ikakhulu abangamalunga e ZACRAS:
Umqondisi wenhlanganiso yezindaba eye Media Institute of Southern Africa-MISA Zimbabwe, umnumzana Nhlanhla Ngwenya uthi kuyadanisa ukuba uhulumende lokhe edonda ukunikeza invumo yokuba limisakazo isungule umsebenzi sona isisekelo sombuso sinanza imisakazo enje njalo uhulumende eseqalisile ukunikeza limvumo kumisakazo ezimeleyo ethi kukhanya injongo ingeyokufuna ukuguqula umthetho kuqala :
Umnumzana Kwangwari uthi noma bedaniswa yikuphuza kuka hulumende ukuvumeza imisakazo enje elizweni kukhanya uhulumende esezinikele ngendlela engcono ukusebenzelana lemisakazo enje silinganisa lokwakusenzakala kudala:
Uthi lokhu yikho osokubenze bacabange ukubamba imihlangano lomphathintambo obona ngezemisakazo kuhulumende, ugatsha lokusebenza kwamagagasi olwe Transmedia kunye lenkokheli zomdabu zinikeze imbono yazo kuloludaba:
Isisekelo sombuso esitsha sikhuthaza ukusungulwa kwemisebenzi yemisakazo yezabelo elizweni noma uhulumende engakanikezi leyomvumo okwamanje kulimisakazo. Imisakazo le ibikwa isebenzisa indlela ezifana lokudindisa ama cds adlalwa kuma combi njalo eminye yayo isebenzisa amagagasi e satellite ukusakaza kumisakazo efana le channel Zim laku shortwave.